Kreml kontrol etken Aqmescitniñ Jeleznodorojnıy rayon mahkemesi esli-başlı qırımlı Yarikul Davlatovğa qarşı çıqarğan qararını halqara mahkemelerge qadar şikâyet etilecektir. Bunı avgustnıñ 14-de aqşam mahkemeden soñ Qırım advokatları Emil Kürbedinov ve Edem Semedlâyev aydınlattılar.
Yarikul Davlatovnıñ özü oña qarşı çıqarılğan ükümni izaatlap, adaletni «bir şeyge yaramağan ve zayıf» olaraq körgenini qayd etti.
Advokat Edem Semedlâyev aqşam saat 23-ke qadar mahkeme binası yanında turıp, qırımtatar faaline çıqarılacaq ükümni beklegen qırımlılarğa teşekkürler bildirdi.
Semedlâyevniñ qayd etkenine köre, advokatlar açuvlğan qırımlılarnıñ duyğularını añlay. Aynı vaqıtta, o, diger faallerni mahkemelerden qurtarmamaq içün ve «hazineni para cezalarınen zenginleştirmemek içün» «qanunnı bozmayıp, areket etmege» çağırdı.
Emil Kürbedinov mahkeme oturışını «daa bir saçmalıq» dep adlandırdı.
«Mahkemede taqdim etilgen malümat bir tenqitke yaramay. Politsiyanıñ tizgen protokolları bizni ara-sıra küldüre edi. Yarikul ağa qayda turğanını öyle de añlamadıq – mahkeme yanındamı-yoqmı», – dedi advokat.
İmaye muracaat berdi, lâkin mahkeme advokatlarnı red etti. O, avgustnıñ 14-de Qırımda olıp keçken bir kişilik narazılıq aktsiyalarını da izaatladı.
«Bu insanlar (esli-başlı qırımlılar, piket iştirakçileri – QA) fikir ve duyğularını bildire bileler. Olar Server ağağa qoltutıp birdemlik köstermege çıqqanlar... 76 yaşında qart adam qaç künden berli apiste yata. Bazıları bu insanlarğa para berildi, olarnı zorladılar, dep aytalar. Şaşam. Bu insanlar ömür körgenler, bizge aqıl bere bileler. Olar aqıllı insanlar, birdemligini kösterdiler. Bir şey bozulmadı, kerçekni ayttılar, olardan örnek almalı», – dep ayttı Kürbedinov.
Kreml kontrol etken Aqmescitniñ Jeleznodorojnıy rayon mahkemesi apiske alınğan Server Karametovğa qoltutmaq içün bir özü narazılıq aktsiyasına çıqqan Yarikul Davlatovğa 10 biñ ruble (tahminen 4,3 biñ grn – QA) para cezasını berdi.
Avgustnıñ 14-de Aqmescitniñ Kreml kontrol etken Yuqarı mahkeme, Qırımnıñ parlament ve ükümet binaları yanında apiske alınğan esli-başlı qırımtatar faali Server Karametovğa qoltutmaq içün bir kişilik piketler olıp keçti. Rusiye uquq qoruyıcıları miting iştirakçilerini tutmağa başladı. Çoqusı yiberildi.
Avgustnıñ 9-nda Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovke 10 künlük memuriy ceza tayin etken edi.
Daa evel mahkeme onı Rusiye Memuriy cinayetler Kodeksiniñ 20.2 maddesine binaen qabaatlı dep tanıyaraq, oña 10 biñ ruble (tahminen 4200 grivna) miqdarında para cezası tayinlegen edi.
Avgustnıñ 8-nde Aqmescitte Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi. 76 yaşında Karametov Parkinson hastasıdır.
