Link açıqlığı

Qırımda esli-başlı insanlarnıñ tutulmasını Birleşken Milletlerniñ halqara mahkemesi baqmalı – uquq qorçalayıcılar


Apiske alınğan Server Karametovğa qoltutmaq içün avgustnıñ 14-de bir kişilik piketlerge çıqqan faallerniñ Rusiye uquq qoruyıcıları tarafından tutulmasını Birleşken Milletlerniñ halqara mahkemesi baqmalı. Böyle bir fikirni Ukraina insan aqları Helsinki birliginiñ uquqçısı Darya Sviridova avgustnıñ 14-de Qırım.Aqiqatqa seslendirdi.

«Qırımtatarlarnı bu şekilde taqip etilmesini qabul etmegen cemaatçılıqnıñ doğru cevabıdır. Bu insanlar (tutulğanlar – QA) memuriy cezağa oğratılsa, halqara qurulışlar, ilk evelâ Birleşken Milletlerniñ halqara mahkemesi bu meseleni baqmalı. Bu areketlerge qırımtatarlar ve «siyasiy ukrainlerni» taqip etüv olaraq qıymet kesilmeli», – dep ayttı Sviridova.

Onıñ aytqanına köre, Rusiye halqara uquqnı körmemezlikke urmağa devam ete.

«Rusiye halqara mahkeme ve siyasiy qurulışlarnıñ qararlarını körmemezlikke ura. Tek Birleşken Milletlerniñ halqara mahkemesi alğan muvaqqat tedbirler aqqında laf ketmey. Birleşken milletler ve Avropa şurası seviyesinde bir çoq rezolütsiya bar, Rusiyege insan aqlarını bozmamağa tevsiye etile», – dep qoştı uquq qorçalayıcı.

Avgustnıñ 14-de Aqmescitniñ Kreml kontrol etken Yuqarı mahkeme, Qırımnıñ parlament ve ükümet binaları yanında apiske alınğan esli-başlı qırımtatar faali Server Karametovğa qoltutmaq içün bir kişilik piketler olıp keçti. Rusiye uquq qoruyıcıları miting iştirakçilerini tutmağa başladı.

Avgustnıñ 9-nda Kremlniñ nezareti altındaki Aqmescitniñ Jeleznodorjnıy mahkemesi «politsiya hadimlerine qarşılıq köstergeni» içün Server Karametovke 10 künlük memuriy ceza tayin etken edi.

Daa evel mahkeme onı Rusiye Memuriy cinayetler Kodeksiniñ 20.2 maddesine binaen qabaatlı dep tanıyaraq, oña 10 biñ ruble (tahminen 4200 grivna) miqdarında para cezası tayinlegen edi.

Avgustnıñ 8-nde Aqmescitte Ahtem Çiygozğa destek bildirmek maqsadınen keçirilgen yalıñız başına bir piket devamında tutılğan esli-başlı qırımtatar faali Server Karametovğa qarşı eki memuriy protokol tizilgen edi. Biri – «yalıñız başına piket keçirüv qaideleri bozğanı», ekincisi – «politsiya hadimlerine qarşılıq köstergeni» içün edi. 76 yaşındaki Karametov Parkinson hastalığına tutulğan insandır.

Ukraina halq deputatı, qırımtatar halqı Meclisiniñ reisi Refat Çubarov Qırım Muhtar Cumhuriyeti prokuraturasına, qanunğa zıt kelgen şekilde Ukraina vatandaşı Server Karametovnıñ azatlıqtan marum etilmesi, onıñ işğal etilgen Qırımda barışıqsever miting keçirmesine mania olğanlarını bildirgen şikâyetnen muracaat etti.Prokuratura qırımtatar faaliniñ tutılıp alınğanı boyunca öz uquqiy noqtai nazarını bildirecegi aqqında haber etti.

Server Karametov işğal etilgen Qırımda bundan evel de tutılğan edi. Böylece, mayısnıñ 18-nde, qırımtatar halqı genotsidiniñ hatırası kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqanından soñ tutılıp alınğan edi. Üç saat tutılıp, oña qarşı memuriy protokol tizilgen soñ, o yiberilgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.


XS
SM
MD
LG