Link açıqlığı

Mahsus Qırım.Aqiqat içün

Rusiyenin Gürcistanğa ücüm etkeniniñ yıllığı aqqında aytılğanda, ilk-evelâ tecavuz ve halqara aq-uquq bozulğanını aqqında hatırlaylâr. Amma Rusiye «barıştırıcılığınıñ» eñ muim neticesi yani etnik temizlevi kölgede qala.

Rusiye er vaqıt öz ücümlerini birisini «qorumaqnen» aqlamağa tırışa. Qırımnıñ zapt etilmesinden evel bütün bu «dostluq trenleri», «rus tilinde qonuşqan ealiniñ» telüke altında kirmesi kibi Rusiye propagandasınıñ işini bir hatırlap baqayıq. Lâkin fakt, fakt olaraq qala: 26 yıllıq ukrain mustaqilligi zarfında kimse etnik sebepke esaslanğan iç bir türlü repressiya olmağan edi ve olması mümkün degil. Atta bügünki künde ukrain devletçiligi ve devletniñ Avropa yolunı saylâması tarafdarlarınen rusiyeli kiralıq qatiller arasındaki qarşılıq etnik degil de, siyasiy renk taşınamqta. Ukraina içün yalıñız etnik ukrainler degil de, atta ruslar, ermeniler, azerbaycanlar, gürciler, çufutlar, qırımtatarları ve daa niceleri cenkleşmekte. «Rus dünyası» tarafdarları yani em kiralıq qatil, em de olarnıñ moskvalı «şorbacıları» arasında tek ruslarnı degil de, etnik ukrainlerni de rastketirmek mümkün. Bu pozitsiyalar küreşidir, yahşılıq ve yamanlıq arasındaki çarpışma ve Ukraina bu vaziyette Kreml rejiminiñ vahşiyligi ve barbarlığına qarşı medeniy dünyanıñ qıymetlerini qorçalay.

Kavkazda vaziyet farqlı edi. Belli ki, Abhaziyanıñ gürci ealisiniñ noqta-i nazarı farqlı olğan, lâkin kimse bu noqta-i nazar aqqında soramağan. Sadece gürciler Abhaziyadan quvuldı. Aman-aman epsi. Gal rayonında qalğan gürci eali zulumğa oğratıla, ana tilinde tasil almaqtan marum etile (olarnı da abhaz tiline degil de, rus tiline çevireler), asla gürci degilsiñiz deyler.

Halqlarnıñ biri-birinden nefret etmesi Moskva içün pek kârlı bir mesele. İşte bu nefret – Rusiyeniñ Kavkazdaki tesiriniñ teminatı

Doquz yıl evelsi aman-aman bunıñ aynısı Cenübiy Osetiyada da tekrarlanğan edi. Bu yalıñız yabancı bir ordunıñ ücümi degil edi. Bu tam manada kerçek bir etnik temizlik areketi edi. Gürciler asırlar boyu yaşağan köylerinde quvulğan edi. Köylerni ise yaqıla edi. İnsanlarnıñ hatırası siline, ev-barqsız bıraqıla edi.

Bunı yapqan tarafnıñ ektsessi diye añlamamalı. Bu Kremlniñ añlı taktikası edi. Moskva içün abhaz ve gürci, osetin ve gürci, ermeni ve azerbaycanlar arasında qanlı uçurum keçmesi kârlı bir meseledir. İnsanlar degil de, halqlar biri-birinden nefret etmeli. İşte bu nefret, bu orta asırlar konservatsiyasında – Rusiyeniñ Kavkazdaki tesiriniñ teminatıdır.

Rusiye başqalarnı yüz yıllar boyunca özü yapıp kelgen meselelerde qabaatlay. Bütün eminliknen er kes vahşiyce davranmalı degen şekilde qabaatlay. İşte bu sebepten ayaqqa turıp öz territorial bütünligini saqlap qalmağa istegen medeniy devletniñ esas maqsadı – deşetli Etni Temizlevler İmperiyasına beñzememege areket etmesinden ibaret olmalı.

«Fikir» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mümkün

XS
SM
MD
LG