Rusiyeli faalci İlya Bolşedvorov Qırımğa işğalden soñ köçip keldi. Artıq o yarımadanıñ ictimaiy ayatında faal iştirak ete. O: Qırım.Aqiqatqa bergen intervyusında Qırımlı cemaatçılar küreşüvde qullanğan usulları em de qarşılaşqan problemaları aqqında ikâye ete.
– İlya, Qırım cemaatçıları kimdir asılında?
– Bügünki künde cemaatçılar ve olarnen Qırım akimiyeti arasındaki munasebet aqqında pek çoq aytıla. Cemaatçılar asılında kimdir?Esasen er türlü ve çoqsı eyi niyet ile akimiyetnen qarşılıqlı alâqa qurıp, cemaat fikirine tesir etüv areketinen, akimiyet tarafından qabul etilecek qararlarğa tesir etmege ıntılğan faal ayatiy pozitsiyası olğan insanlardır. Olarnıñ arasında şeerde çiçek ve terek oturtulğanını istegenler, yetim ve evsizlerni qayğırğan, ayvanlarnı sevgen insanlar da bar. Mındaki insanlarnıñ akimiyetnen dialog quracaq türlü-türlü maqsat ve vastaları mevcut.
– Bu nasıl bir vastardır, aceba?
– Bazıları toqtamay rica etip yalvarmağa, bazıları bir niyetnen qavğa etmege, bazıları ise, qavğadan bezip talap etmege azır.İşte bu baqıştan, artıq maqsadına farqlılığına köre de, er biri er türlü. Buña şaşmanıñ sebebi de yoq, çünki cemaatçılar – cemaatnıñ çeşit qatlamlarından çıqqan, çeşit degerler ve areket usullarına saip insanlardır.
– Olarnıñ maqsatqa irişüv vastalarını aqlı dep saymaq mümkünmi?
– Cemaatçılar meselesinde, esasen musbet olğan insanlar öz maqsadına irişmek içün, cemiyette muim sayılğan diger menfaatlardan nasıl etip vazgeçmege azır olmaları mümkün? Şeerniñ «inkişaf etmesi» oğrunda olar şeer sakinleriniñ evlerinden quvğan qanunsız qurucılıq yanında nasıl yaşamaları mumkün?
Aslında şeerniñ toprağını çalğan inşaatçını qorumaq içün nasıl etip cemiyetniñ menfaatlarını bir kenarğa atmaq mümkün?
Aslında şeernin toprağını çalğan inşaatçını, şeerniñ inkişafına bir kapik qoşmadan, Federal maqsatlı programma (FTSP) infrastukturasınıñ obyektleri ve şeer kommunikatsiyaları esabına aqça qazanmağa tırışqan, şeerge nisbeten ictimaiy terrorizm siyaesti alıp barğan inşaatçını qorçalamaq maqsadınen milletler arasındaki birlikten nasıl etip vazgeçmek mümkün?
– Qırımda çalışqan KHV işbu menfiy vaqialarnı nasıl aks ettire?
– Bilgenime köre, Qırımnıñ kütleviy haber vastaları özüniñ informatsion siyasetini yerli akimiyetnen uyğunlaştırğanı sebebinden bu meselelerde olardan tenqit ya da aq sözlülik beklemege sıra tüşmey. Çoq para qarşılığında at oynatıp olğan şeer ve cumhuriyet temsilcileri qurucılıq ve qaparcılıqqa qarşı küreşken insanlarnı çamurğa batırılmaq içün çeşit türlü zorluqlarnen rastkelişe.
– Bu ne şekilde yapıla?
– Olarğa qarşı çıqqanlarnı qaralamaq maqsadınen inşaatçılar uydurma internet saifeleri aça, iç bir ispat köstermeden opponentlerini satqınlıqta qabaatlay. Bazen mesele müşkül derece yete, meselâ, Gennadiy Baharev (Rusiye nezaretindeki Aqmescit yolbaşçısı –QA) iç bir esası olmadan, ğayrı resmiy inşaatçılarnen küreşkenlerni yasaq etilgen teşkilât ve ukrain millitçilerinen işbirligi yapqanlarında qabaatlay ve böylece milletlerara kerginlik yarata.
İftira dalğasına ve yapıştırılğan satqın tamğasına qarşı turmaq qıyın bir mesele. Ancaq bunı cemaatçılar yapmasa, bu işni kim yürsetecek?
Cemaatçılar özlerini şeer sakinlerinden ayırmaq, şeerdeki ruhsetsiz qurucılıqnen bağlı real zorluqlardan qorçalav işinden ayrı qalmaq isteydirlermi? Olar bir anda kârlı olmaq içün, şeer sakinleriniñ közünden tüşerek, satqın şeer akimiyetinen bir basamaqta turmaq, aqsızlıqnı qorçalamaq isteydirlermi?
Aqıntınen beraber aqmaq pek qolay bir iş, amma belki de bazılarınıñ işbu iftira dalğasına, satqın tamğasını yapıştırma teşebbüsine qarşı turması pek qıyındır. Ancaq bunı cemaatçılar yapmasa, bu işni kim yürsetecek?