Link açıqlığı

Qırımnıñ Qarasuvbazar rayonında Rus silâlı hızmetleriniñ areketi aqqında haber etile


İşğal etilgen Qırımda Qarasuvbazar rayonındaki Üç Köz köyunde avgustnıñ 10-nda saba Rusiyeli silâlı hızmetler soqlaqlardan birini qapattı. Bunı Facebookta Qırımtatar Milliy Meclis reisi Refat Çubarov, ve qırımtatar faili Zair Smedlâyev haber ettiler.

«Qırımnıñ Üç Köz (şimdiki – Novoklönovo) köyünde Qarasuvbazar (şimdiki – Belogorsk) rayonında rus işğalcileri soqaqlardan birini qapata. Ğaliba, nevbetteki tintüv ve apis etüv yapıla», – dep yazdı Çubarov.

Advokat Emil Kurbedinovnıñ bergen malümatına köre, Çehov soqağında çoq balalı aileniñ evinde tintüv ötkerile.

«Qırım musulmanlarnıñ evinde yañı tintüv! Qarasuvbazar, Novoklönovo köyü, Çehov soqağı, 26. Evde eñ azından dört bala», – dep yazdı Facebookta Kurbedinov.

Qırım.Aqiqat vaqianıñ tafsilâtını qırımlı faillerden ve uquq qorçalayıcılardan ögrenmege tırışa.

Qırımdaki Kremlniñ nezaretindeki silâlı hızmetlerniñ saytlarında Qarasuvbazar rayonında er angi ameliyatlar aqqında iç bir şey bildirilmegen.

İslâm Terek qasabasınıñ sakini, qırımtatarı Umer Emiramzayev, avgustnıñ 9-nda saba onıñ evine Rus silâlı hızmetleri tintüv ötkermek içün kelgen soñ, pek yaramağan. Oña acele yardım maşnası çağırttırıldı ve kendisi hastahanege alıp ketildi. Erkekke bir de bir iddialar bildirilmedi.

Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG