Link açıqlığı

(Qırımtatar milliy areketiniñ yetekçilerinden biri Ahtem Çiygoznıñ, 2017 senesi avgustnıñ 9-nda Rusiyege tabi olğan Qırım Yuqarı mahkemesinde aytqan soñ sözü)

Anamnıñ soñki künlerinde ondan afu sorağan edim, çünki oğlu olaraq soñki eñ ağır künlerinde yanında olamadım. Bar küçüni toplap, o dedi ki: «Böyle evlât terbiyelegenimden ğururlanam!»

Ne yapsam da, ne qadar qıyın olsa da, bu yerden sağ çıp çıqamaycağımı bilmeyip, daa büyük qorqum – menim areketlerim, fikirlerim, sözlerim meni insan olaraq, qırımtatarı olaraq masqara ete bileceklerinden qorqqanımdır, ve menim halqım, maña işanıp, meni Qırımtatar Milliy Meclisine saylağanı içün peşman eteceginden qorqqanımdır.

«Ant etkenmen, söz bergenmen millet içün ölmege...» Bu antnı men, Meclisniñ başqa azaları kibi, tiz çökip ve milliy bayrağımıznı öpüp Hanlar Sarayınıñ azbarında bergen edim – bu yer ise milletimizniñ, asırlar devamında üküm sürgen devletçiligimizniñ timsalidir.

Defalarca sürgün etilgenimizniñ, amelde ise genotsidniñ, kerçek sebebi – Rusiye İmperiyası, soñra ise SSCB, Qırımnı qırımtatarlardan temizlep, halqımıznıñ tarihını ve hatırasını yoq etmege istegenidir.

Er bir qırımtatarı bu sözlerni aytıp, ant ete ve öz milletiniñ kelecek nesilleri ögünde, Vatanı ögünde mesüliyetli olğanını iss ete.

Qırımtatarları içün, bir-çoq başqa milletler içün olğanı kibi, «vatandaşlıq borcu», «vatanperverlik», «milliy menlik» añlamları alelhusus degerge maliktir

Halq özü özüne yetekçi saylay. Nesilden nesilge miras etilgen Vatan sevgisini, ana-topraq sevgisini, milliy menlikni iç bir şey yoq etip olamadı, halqnıñ iradesini iç bir şey sındırmadı. Qırımtatarları içün, bir-çoq başqa milletler içün olğanı kibi, «vatandaşlıq borcu», «vatanperverlik», «milliy menlik» añlamları alelhusus degerge maliktir.

2014 senesi fevralniñ 26-nda qırımtatarları, Ukrainanıñ başqa vatandaşları kibi, nevbetteki kere Ukrainanıñ bütünligi içün havflı olğan telükege qarşı çıqtı ve akimiyetteki avantürist ve pezevenklerniñ cevapqa çekilmesini talap etti.

Bundan soñ Qırım işğali devamında qırımtatarlar Ukrainanıñ diger vatandaşlarınen birlikte, bu küçler tarafından yapılğan tahriklerge baqmadan, esirlik, öldürüv, tintüv, apis etüv, matem tedbileriniñ yasaq etilüvi, er angi faaliyet içün büyük para cezanıñ tayin etüvine baqmadan, keñiş sürette qullanılğan basqı usullarına baqmadan, öz vatandaşlıq borcunı eda etmege devam etti ve devam ete.

Bunıñ episi bu küçlerni siñirlete, açuvlandıra ve masüm adamlarnı mahküm etmege mecbur ete.

Tarihke endi «26 fevral davası» kibi kirgen bu siyasiy ceryan eki yıldan çoq devam etmekte. Bu ceryannıñ maqsadı, elbette, qırımtatarlarnı qorqutmaqtır, öz aqlarınıñ qorçalanuvı içün alıp barılğan faaliyetni boğmaq ve Qırım işğalini qanunsız dep tanığan Urainanıñ ve dünya cemaatçılığınıñ destegini eñ alçaq seviyege ketirmektir.

Mahkemeni istilâcı-devlet ötkere. Onıñ ise böyle bir aqqı yoq

Ahtem Çiygozğa qarşı iç bir cinaiy dava açılmağanını er kes köredir. Fevralniñ 26-nda 2014 senesi Qırımtatar Milliy Meclisi tarafından ilân etilgen barışıqlı miting devamında yer alğan qazalar – bundan soñ Qırımnıñ arbiy istilâsını destekleten şahıslar tarafından o vaqıt tahrik etilgen edi. Yani mahküm etilgenler – hainler degil, Ukrainanıñ topraq bütünligini deñiştirmek niyetinde olğanlar degil, idare ve mahkeme etmek aqqını qanunsız surette özlerine alğanlar degil. Devletniñ qanunlarını, halqara uquqnı, qaidelerni qorçalağanlar mahküm etile.

Mahkemeni istilâcı-devlet ötkere. Onıñ ise böyle bir aqqı yoq.

Olğan vaziyette, bu ceryannı sımarlağanlarnıñ kerçek niyetlerini bilip, mahkemeniñ obyektiv ve mustaqil olacaqı aqqında laf aytmaqnıñ yeri yoq.

Bu ükümni – Vatanımı işğal etken Rusiye Federatsiyası adından bütün qırımtatar halqına berilgen üküm olaraq qabul etmek zorundam.

Ahtem Çiygoz, qırımtatar halqınıñ yetekçilerinden biri, siyasiy mabus

«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışlarınen aynı olmaması mümkün

XS
SM
MD
LG