Aqmescitte Kremlge tabi olğan Demiryol rayon mahkemesi qırımtatar faili Server Karametovnı, Rusiye Memuriy cinayetler Kodeksiniñ 20.2 maddesine binaen, qabaatlı olaraq tanığan ve oña 10 biñ ruble (tahminen 4200 grivna) miqdarında para cezası tayinlegen.
Qırım.Aqiqat muhbiri, failge qarşı tizilgen ekinci memuriy protokol boyunca mahkeme toplaşuvı başlanğanını bildirdi.
Bundan evel, mahkeme devamında Server Karametov yaramağanı ve oña acele yardım çağırılğanı haber etilgen edi.
Avgustnıñ 8-nde Aqmescitte, Ahtem Çiygozğa destek bildirmek maqsadınen keçirilgen yalıñız piket devamında tutılğan esli-başlı qırımtatar faili Server Karametovğa qarşı eki memuriy protokol tizilgen. Biri – «yalıñız piketlerniñ qaideleri bozulğanı» sebebinden, ekincisi – «politsiya hadimlerine qarşılıq kösterilgeni» içün.
Server Karametov işğal etilgen Qırımda bundan evel de tutıla edi. Mayısnıñ 18-nde, qırımtatar halqı genotsidiniñ hatıra kününde o Aqmescitte, qırımtatar milliy bayrağını ve 1944 senesi sürgünlik qurbanları olğan ana-babasınıñ fotoresimlerini alıp çıqqan edi, ve o arada yaqalandı. Üç saat soñra, oña qarşı memuriy protokol tizilgen soñ, o yiberilgen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
