Kremlniñ nezaretindeki Qırım Yuqarı mahkemesi avgustnıñ 7-nde, qırımtatar milliy areketniñ yetekçilerinden biri Ahtem Çiygozğa qarşı açılğan dava esnasında mahkeme diñlemelerini başlatıp, toplaşuvnıñ devamını avgustnıñ 8-ne qaldırdı, çünki eklektrik aqımını teminlegen ağ alevlengen. Bunı Qırım.Aqiqatqa advokat Nikolay Polozov haber etti.
Advokat dedi ki, mahkemeciler, saat 9:30-da toplaşuv başlanacağına qadar elektrik aqımı tüzetileceginde emin degiller.
Bundan evel, mahkeme binası elektriksiz qalğanı malüm etilgen edi.
Kreml kontrol etken işğal etilgen Qırımnıñ Yuqarı mahkemesinde avgustnıñ 7-de Ahtem Çiygoz davasınıñ munaqaşaları başladı. Oturışqa üç zarar körgen kişi keldi – Fatuyev, Baranov, Solovyev. Mahküm etilgenge qoltutmaq içün tahminen 50 insan keldi, şu cümleden İlmi Umerov ve diger qırımtatar faalleri.
Avgustnıñ 1-de qırımtatar liderlerinden biri Ahtem Çiygoz davasınıñ mahkeme taqiqatı yekünlendi.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
