Link açıqlığı

Qırım mahkemesinde prokuror Çiygoz 8 yılğa azatlıqtan marum etilsin istey


Kreml kontrol etken Qırım Yuqarı mahkemesiniñ qırımtatar milliy areketiniñ liderlerinden biri, mahküm etilgen Ahtem Çiygoznıñ davası boyunca oturışında avgustnıñ 7-de prokuror Anastasiya Suprâga qabaatlanğan kişiniñ 8 yılğa azatlıqtan marum etilmesini istedi.

Qırım.Aqiqat mühbiriniñ bildirgenine köre, prokuror kösterilgen deliller mahküm etilgen kişiniñ qabaatını bütünley isbatlay, dep israr ete.

Prokurornıñ aytqanına köre, «mahkeme taqiqatında mahküm etilgenniñ qabaatı bütünley isbatlanğan». O, çoqusı 2015 senesi mayıs ve iyün aylarında keçirilgen ekspertiza qararlarına, em Sergey Aksenov, Zaur Smirnov, Eyvaz Ümerov, Sergey Tsekov, Olga Kövitidi, Vladimir Konstantinov ve üç gizli şaatnıñ malümatına esaslandı.

Bundan ğayrı, prokuror video levhaları aqqında hatırlattı, olarnıñ bir qısmı Ahtem Çiygoznıñ insanlarnı bir sırağa (2014 senesi fevralniñ 26-da Qırım Yuqarı Şurasınıñ binası ögünde – QA) tizgenini köstere. Qabaatnıñ diger delili, prokurornıñ aytqanına köre, Yunusov, Kantemirov ve Eskender Nebiyevniñ bergen malümatı oldı. İmaye şaatlarınıñ malümatı diger delillerni red etmey, dep tüşüne qabaat tarafı. Prokuror «Qırım Rusiyege qoşulğan soñ vatandaşlarnıñ aq-uquqları ve menfaatları qorçalansın dep, Rusiye qanunları bundan evelki cinayetlerge nisbeten de qullanılmağa başladı», dep ayttı.

Prokuror çıqışta bulunğanda advokat Aleksandr Lesovoy qabaatnı qısqadan yazıp almağa yetiştirmek içün yavaş aytmağa talap etti. Qadılar yetiştirgenini ayttılar.

Kreml kontrol etken işğal etilgen Qırımnıñ Yuqarı mahkemesinde avgustnıñ 7-de Ahtem Çiygoz davasınıñ munaqaşaları başladı. Oturışqa üç zarar körgen kişi keldi – Fatuyev, Baranov, Solovyev. Mahküm etilgenge qoltutmaq içün tahminen 50 insan keldi, şu cümleden İlmi Umerov ve diger qırımtatar faalleri. Salonda boş yer qalmadı, diñleyicilerniñ bir qısmı oturışqa kiremedi, dep bildire Qırım.Aqiqat mühbiri.

Avgustnıñ 1-de qırımtatar liderlerinden biri Ahtem Çiygoz davasınıñ mahkeme taqiqatı yekünlendi.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG