Link açıqlığı

(Qırımda mahküm etilgen ukrain faili Vladimir Baluhnıñ soñ sözü, avgustnıñ 1-i 2017 senesi)

Bütün taqiqat ve prokuraturanıñ mahkemedeki bütün areketleri bir şeyni tasdiqlay: taqiqat organları biriniñ sımarışını eda etmekte. Maña iç bir zaman ait olmağan evde tapılğan eşyalarnen nasıl bağlı olğanıma, olarnı qaydan alıp, nasıl saqlağanıma dair iç bir delil, eñ azından dolayılı olğan iç bir isbat kösterilmedi. O evde ancaq eşim yaşay, men anda öz şeylerimi bile tutmadım. Yaşağanım evde ise er zaman menim ihtiyar anam buluna, etrafta çoq qomşularımız yaşay, olarnıñ köpekleri bar, er şeyimiz körüne. Anda sezdirmeden keçmege er vaqıt pek qıyındır, patlayıcı aletni ise anda qaldırmağa daa zor. Evimniñ dört çardağı bar, amma olardan iç biri eşimniñ evindeki çardaq kibi közden keçirilmedi. Barnauldan kelgen bu aletler o yerge nasıl ketirilgen, kim olarnı alıp, o yerge qoyğan? Bu hususta iç bir taqiqat tedbiri alınmağan, albu ki maña qarşı yapılğan cinayetniñ taqiq etilmesi içün bu yekâne yoldır.

Ya da, belki, uquq qoruyıcılar yasaqlanğan eşyanı qabaatsız adamnıñ evine özleri ketirgenleri tarihta iç bir vaqıt olmadımı? Menim davamda ameliy malümat gizlenilgen! Men devlet sırını taşığan biri olammı, yoqsa? Nasıl etip, gizlenilgen malümat esasında prokuror menim qabaatıma işana bile? 19 qurşunnıñ qalımtısını men nege alğan ekenim ve qanunsız saqlağan ekenim, aytarsıñızmı? Ya da men o qurşunlarnı bir yerde qullandımmı? Aysa, angi silânen?

Er biri öz günahları içün cezasını alacaq. Sadece maña qarşı degil de, yer yüzünde bütün insaniy şeylerge qarşı yapılğan cinayetniñ cezası berilecektir

Bu tecribeli bir munafıqlıqtır: üzerinde Ukraina bayrağı pekitilgen evniñ damı tübüne yasaqlanğan bir şey ketirip qoyıp, soñra haince ve yüzsüzce ırcayıp bunı çıqarmaq ve soñra mında mahkemede, men tintüv vaqıtında nasıl tarsıqqanım aqqında tarif etmek. Meraqlısı şu ki, taqiqatçı Popov, maña qarşı ifadelerini berip, öz Volgograd vilâyetine keri qayttı – mavr öz işini becergen. Mennen oynalğan bütün bu uydurmanıñ ilhamcısı ve rejissörı tamam odır. Bu adam er zaman adiselerniñ merkezinde edi ve maña qarşı yapılğan areketni idare ete edi.

Menim ayatıma sert şekilde kiriştiler, ayaq astına aldılar, ve maña qarşı yapılğan bu provokatsiyanıñ bazı icracıları endi özleri de taqiqatqa oğradı, birisi atta apishanede otura. Men şübesiz eminim ki, er biri öz günahları içün cezasını alacaq. Sadece maña qarşı degil de, yer yüzünde bütün insaniy şeylerge qarşı yapılğan cinayetniñ cezası berilecektir

Fitneñizni gizlemek içün meni apishanede saqlamaq – bu sizge iç bir zaman yardım etmez

Mahkeme devamında köz ögümde şaatlarğa «doğru» ifadelerni fısıldamaq içün çapıp kelgenlerini köre edim. İddianıñ uydurılğanını tasdiqlay bilecek iç bir ekspertizanı keçirmege imayecilerime musaade etilmedi. Meni atta yalan detektörinde sınap baqmağa istemediler, ta ekstremizm aqqında evelki dava esnasında. Bu yerde teren talilniñ keregi de yoq, er şey ayan-beyandır.

Aslında, aqiqatnı tasdiqlamaq içün bizler soñuna qadar başqa mahkemelerge muracaat etecemiz. Fitneñizni gizlemek içün meni apishanede saqlamaq – bu sizge iç bir zaman yardım etmez.

Üriyet – bu ayat tarzıdır, insannıñ mevcudiyet usulıdır.

İşğal etilgen Qırımda cuma künü, avgustnıñ 4-de, ukrain faali Vladimir Baluhnıñ ükümi çıqarıldı – umumiy rejimli apishanesinde 3 yıl ve 7 ay yatacaq, 10 biñ ruble miqdarında para cezasını ödeycek. O silâ ve patlav aletleriniñ saqlavında qabaatlana. Baluh, oña qarşı atılğan iddialar siyasiy sebeplerden peyda olğanını tasdiqlay.

Vladimir Baluh, Qıımda Rus mahkemesi tarafından mahküm etilgen urain faili

«Bloglar» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mumkün.

XS
SM
MD
LG