Link açıqlığı

Qırımda İçki rayonınıñ sakini eki künge tevqif etildi – fail


Qırımda İçki rayonınıñ sakini Mamet Kurkçi eki künge apiske alındı. Bunı Qırım.Aqiqatqa bergen izaatında qırımtatar milliy areket faili Nariman Celâl haber etti.

«Bir mayor çıqıp, 48 saatqa onı (Kurkçi Mametni – QA) tevqif etmek içün olarnıñ aqqı olğanını aytqan, sanki mahkemege qadar. Apis etüvniñ sebebi nedir, degen sualge, o dedi ki, bu adam bir de bir qanun bozuvnen alâqalı olğanına dair deliller bar eken. Oña eşyalarını ketirmege izin berildi», – dep haber eti Celâl.

O ayttı ki, tutılğan adam advokatnıñ yardımına muracaat etkeni aqqında malümat şimdi daa belli degil.

«Adliyecilerimizge, onnen bağlansınlar dep, rica ettik. Amma bu bağ daa olmadı. Vaziyetke tesir etmege tırışamız», – dedi fail.

İşğal etilgen Qırımnıñ İçki rayonında avgustnıñ 2-nde Üç-Quyu (Vostoçnoye) köyüniñ sakini Mamet Kurkçiniñ evinde tintüv ötkerildi. Qırımlınıñ telefonı tutıp alınılğanı ve özü İçki İşleriniñ Rayon Bölügine (ROVD binasına) ketirilgeni aqqında haber etilgen edi.

Rusiye Qırımnı işğal etken soñ yarımadada mustaqil jurnalistler, cemaat failleri, qırımtatar sakinleri muntazam surette tintüv ve soravlarğa oğray. Uquq qorçalayıcılar bunı «fikir farqlılığına qarşı küreş» olaraq tanıta.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG