İşğal etilgen Qırımnıñ İçki rayonında Üç-Quyu (Vostoçnoye) köyüniñ sakini Kurkçi Mametniñ evinde tintüv ötkerildi. Bunı qırımtatar milliy areketiniñ faili Nariman Celâl Facebookta haber etti.
Onıñ sözlerine köre, köy sakinni yerli politsiya idaresine ketirilgen.
«Bügün saba saat altıda Qırımnıñ İçki rayonında Üç-Quyu (Vostoçnoye) köyünde qırımtatarı Kurkçi Mametniñ evinde tintüv oldı. Şimdi yerli politsiyanıñ hadimi onı ROVD binasına ketirdi. Faillerimiz tintüvniñ sebeplerini ögrenmege tırışa», – dep yazdı Celâl.
Sebepler şimdige qadar malüm degil, Qırım.Aqiqat tafsilâtnı ögrenmekte.
Rusiye Qırımnı işğal etken soñ yarımadada mustaqil jurnalistler, cemaat failleri, qırımtatar sakinleri muntazam surette tintüv ve soravlarğa oğray. Uquq qorçalayıcılar bunı «fikir farqlılığına qarşı küreş» olaraq tanıta.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
