Link açıqlığı

Qırımda İlmi Umerovnıñ davasında mahkeme devam etecek


Kremlge tabi olğan Aqmescit rayon mahkemesi avgustnıñ 2-nde qırımtatar milliy areketiniñ yetekçilerinden biri İlmi Umerovğa qarşı açılğan davanıñ baqılması devam ettirilecek.

Mahkümniñ qızı Ayşe Umerova, bundan evelki oturışta bir ay devamında teneffüs olacağı ilân etilgen edi. Lâkin kelecek künü kâtip, telefon açıp, mahkeme toplaşuvları adiy grafik boyunca, yani avgustnıñ 2-nde, devam eteceklerini haber etti. Bu deñişmeniñ sebepleri daa belli degil.

«Umerov davasınıñ» soñki mahkeme toplaşuvında FSB taqiqatçısı sorğuğa çekilgen edi.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı. Er afta çarşenbe künleri mahkeme oturışları olacağı haber etile.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.

XS
SM
MD
LG