Link açıqlığı

Saatnıñ esas haberi

«Umerov davasınıñ» mahkemesinde FSB hadimi taqiqat malümatlarını «unuttı» – qabaatlanğannıñ qızı


Kreml kontrol etken Aqmescit rayon mahkemesinde qırımtatar milliy areketiniñ liderlerinden biri İlmi Umerovnıñ davası boyunca keçirilgen oturışta FSB taqiqatçısı İgor Skripka sorğuğa çekilgende davanıñ şaatı olğan qırımtatar tercimanınıñ bergen malümatına zıt kelgen malümat bere.

Bunı qabaatlanğannıñ qızı Ayşe Umerova iyülniñ 26-da Facebookta haber etti.

Onıñ aytqanına köre, Skripka taqiqatnı başından alıp barğan edi, lâkin mahkemede berilgen bir çoq sualge hatırlamayım dep cevap bere, FSB taqiqatçısınıñ malümatı diger şaatlarnıñ malümatına zıt kele. Şu cümleden şaatlarnıñ sorğu sayısı, yeri aqqında aynı malümat yoq, taqiqatçı eki şaatnıñ malümatları aynı olğanını añlatıp olamadı.

Ayşe Umerovanıñ qayd etkenine köre, qırımtatarcadan tercime yapqan terciman taqiqatçıdan farqlı malümat berdi, İgor Skripka tercimannı iftira atqanında qabaatladı.

«İmayeniñ terciman FSBge 3-5 kere davet etilip, tercimeni bir qaç kere imzalağanı aqqında sualine (İgor Skripka – QA) Saledinov (terciman – QA) oña iftira ata, dep cevap berdi. Onı iftira atqanında qabaatlap, qadıdan şahsiy qarar çıqarmağa talap etti (bugünki statusı ise bir şey talap etmege imkân bermey)... Skripka nervalana, yüzü terley, qaşları köterile, almaçıq kemigi qıbırday», – dep qayd etti İlmi Umerovnıñ qızı.

Onıñ bildirgenine köre, Skripka mahkemede İlmi Umerov mahküm etilgen maddeni aytıp, bir qaç kere «topraq bütünliginiñ ayırılması» ifadesini qullandı.

«Advokatlarnıñ sualleri peyda oldı, bu ibareni qaydan alğanını ve ne ifadelegenini soradılar, qanun normalarını ne içün bozğanını soradılar? Cevap mükemmel oldı: «Siz raatsıñız, menim ise vesiqalarım yoq», – dep qayd etti Umerova.

İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.


XS
SM
MD
LG