Norvegiya, Albaniya, Qaradağ, Gürcistan ve Ukraina Rusiyeniñ istilâsına oğrağan Qırımğa qarşı iqtisadiy sıñırlamalarnı daa bir yılğa uzattı. Bunı Avropa Birliginiñ Tışqı işleri ve telükesizlik siyaseti boyunca Baş temsilcisi Federica Mogherini beyan etti.
AB ise iyünniñ soñunda sanktsiyalarnıñ müddetini uzatqan edi. Avropa Birligi Şurasınıñ qararı Kremlde tenqid etilgen.
Sıñırlamalar Qırımda çıqarılğan er angi mahsulatnı AB devletlerine ital etmege ve Avropa tarafından Qırımğa yatırım etmege, ayrıca yarımadada taşınmaz mülkni satın almağa, bizneske para bermege ve hızmetlerni eda etmege yasaqlay. Avropalı gemiler de, fevqulâde vaziyetlerden hariç, Qırımnıñ deñiz limanlarına kirip olamay.
2014 senesinden berli Ğarp devletleri Rusiyege qarşı bir qaç basamaqtan ibaret sanktsiyalar qabul etti – ilk başta Qırımnıñ zapt etilmesi, ondan soñ – Donbassta üküm sürgen ve Moskva tarafındfan qoltutulğan silâlı dava sebebinden.Sanktsiyalar rusiyeli şahıs ve şirketlerge, em de Donbass ve Qırımdaki ayırımcılarnıñ adamları ve müessiselerine, ve Ukrainanıñ sabıq idarecilerine aittir. Bunen beraber Rusiye iqtisadiyatınıñ bazı saaları da sıñırlav ükümine oğradı.
