Link açıqlığı

Saatnıñ esas haberi

Çiygoz: 2014 senesi Qırım parlamentiniñ spikeri Konstantinov Euromaydan liderlerinen körüşmege istegen edi


Kreml kontrol etken Qırım Yuqarı mahkemesinde iyülniñ 26-da qırımtatarlarnıñ liderlerinden biri, apiske alınğan Ahtem Çiygoz sorğuğa çekilip, Qırım parlamentiniñ spikeri Vladimir Konstantinov 2014 senesi fevralniñ 24-de Euromaydan liderlerinen bağ qurmaq içün Qırımtatar Milliy Meclisiniñ reisi Refat Çubarovnen körüşkenini bildirdi.

Bunı Çiygoznıñ advokatı Nikolay Polozov iyülniñ 26-da Qırım.Aqiqatqa tarif etti.

«Ahtem Çiygoznıñ fikirince, bu körüşüvniñ sebebi Ukraina prezidenti Viktor Yanukoviçniñ qaçqanı oldı, Konstantinov ve «Regionlar firqasınıñ» diger vekilleri ise Kyivniñ yañı akimiyetinen bağ quracaq ediler... Konstantinov şaşmalağan edi: Yanukoviç qaçıp ketti, Turçinov, Yatsenük ve Euromaydannıñ diger liderlerinen tez-tez iş tutmaq kerek», – dep tekrarladı Ahtem Çiygoznıñ aytqanlarını advokat.

«Çiygoz davasınıñ» mahkeme oturışında Vladimir Konstantinov 2014 senesi fevral ayında Meclis reisi Refat Çubarovnen körüşkende Ahtem Çiygoz ve Zaur Smirnov da bar ediler, dep bildirgen edi.

Ahtem Çiygoz mahkemede 2014 senesi fevralniñ 24-de olıp keçken körüşüvde Konstantinov Ukraina akimiyetinden Qırım Muhtar Cumhuriyeti vekâletlerini kenişletmesini talap etmege teklif etken edi, dep tarif etti. Çiygoznıñ aytqanına köre, Konstantinov Refat Çubarov ve qırımtatarlarnıñ lideri Mustafa Cemilevni qullanıp, Euromaydandan soñ Ukrainada akimiyetke keçken siyasiy küçlerniñ liderlerinen körüşmege istegen edi.

«Ahtem Çiygoz Konstantinov qırımtatarlarnıñ lideri Mustafa Cemilevniñ itibarını Kyivde qullanıp, Ukrainanıñ yañı akimiyetinen añlaşmağa ümüt etken edi, dep ayta. Akimiyet organlarındaki yerler aqqında da laf oldı. Çubarov subet vaqtında Konstantinovnıñ Moskvağa barıp, «rus çarına temenna etkenini» soradı, lâkin Konstantinov bir şey aytmadı», – dep tarif etti Qırım.Aqiqatqa Polozov.

Qırımtatarlarnıñ lideri Mustafa Cemilev Qırım.Aqiqatqa izaat berip, Qırım memurlarınıñ onıñ adını qullanıp, Ukraina akimiyetinen bağ tutmağa tırışqanını bilmegenini ayttı.

Refat Çubarov 2014 senesi fevralniñ 24-de degil de, 25-de Konstantinovnen körüşkenini tasdıqladı. O, Ukraina topraq bütünligi içün telükeli ola bilecek meseleler Qırım parlamentiniñ nevbetten tış sessiyasınıñ kün tertibine kirsetilgenini ögrengen edi. Çubarovnıñ aytqanına köre, o, Konstantinovdan sessiya keçirilmesini bir qaç künge qaldırıp, Kyivdeki Ukraina akimiyetinen körüşmege rica etken edi.

İyülniñ 25-de mahkeme Ahtem Çiygoznı sorğuğa çekmege başladı. Advokat Nikolay Polozovnıñ bildirgenine köre, birinci sorğu fevralniñ 25-de ve 26-da olıp keçken vaqialarnıñ tarihiy tarafları ve esaslarına bağışlandı. İyülniñ 26-da keçirilgen ekinci sorğuda ise Çiygoz 2014 senesi mitingniñ teşkil etmesinen oğraşmağanını ayttı.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG