Link açıqlığı

Saatnıñ esas haberi

«Umerov davası» esnasında «zıddiyetlerni al etmek içüñ» FSB taqiqatçısına sorğu soralacaq


İyülniñ 26-nda, çarşenbe künü, Qırımda qırımtatar milliy areketiniñ yetekçilerinden biri İlmi Umerovğa qarşı mahkeme davasınıñ nevbetteki toplaşuvı ötkerilecek.

Mahkeme tarafından toplaşuvğa FSB taqiqatçısı İgor Skripka çağırıla. Böyle qarar iyülniñ 19-da, İlmi Umerovnıñ qırımtatar tilinde ATR telekanalınıñ efirinde yapqan nutuğını tercime etken terciman Hubedin Saledinov sorğudan keçken soñ qabul etilgen edi.

Sorğu devamında terciman dedi ki, FSB taqiqatçısı onı bir-qaç kere çağırttırıp, tercime metinini ğayırdan imzalamağa rica etken eken. Böyle etip Saledinov, mahkeme esnasında tercime metini talil etilgen vaqıtta tapılğan hatalarnı añlatqan edi. Bu sebepten mahkeme, «zıddiyetlerni al etmek içüñ» şaat olaraq taqiqatçı İgor Skripkanı sorğuğa çağırttırdı.

İyünniñ 7-nde işğal etilgen Qırımda Kremlniñ nezaretindeki Aqmescit rayon mahkemesi İlmi Umerov davasınıñ esasını baqıp başladı.Er afta çarşenbe künleri mahkeme oturışları olacağı haber etile.

2016 senesi FSB taqiqatçıları İlmi Umerovqa qarşı ektremizm maddesi boyunca cinaiy iş açqan edi. Qırımtatar milliy areketiniñ belli iştirakçisi, qırımtatar Meclisi reisiniñ muavini olğan İlmi Umerovnıñ tutulıp alınuvı, evindeki tintüv ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada rezonans çıqarğan edi.

İlmi Umerovnıñ özü bu mahkeme davası sımarışnen yapılğanını, ükümi ise – evelden belli olğanını tüşüne, ve taqiqatçılar, stenogramma kibi tanıtılağan sözme-söz tercimeniñ lisaniy ekspertizasını qullanıp, añlamlarnı qarıştırğanını ayta.

XS
SM
MD
LG