Aqmescitte fevralniñ 26-nda, çarşenbe künü, «Men – suv» adlı bilgi tarqatuv aktsiyası başlatılacaq. Merasimniñ maqsadı – gençlerniñ ekologik terbiyesi ve suv ihtiyatlarını tutumlı qullanmaq teşviqatı. Bunı şeerdeki Rus memuriyetiniñ matbuat hızmeti bildire.
Bildirüvde: «Aktsiya çerçivesinde balalar içün maarif-eglence merasimleri teşkil olunacaq: resimler yarışı, akvagrim, suv mevzusınen bağlı suallerden ibaret bilgi yarışması ve meraqlı vazifeler. Aktsiya devamında şeer sakinlerine ve musafirlerine mahsus azırlanılğan turistik şapkeler, balonlar, mevzuğa ait anahltarlıqlar ve merasimniñ mevzusına dair işaretler üleştirilecek», – dep aytıla.
Memuriyette bildirdiler ki, aktsiya iyülniñ 28-ne qadar devam etecektir.
Qırımnıñ rusiyeli akimiyeti bildirgenine binaen, yarımadanıñ suv ambarlarındaki içilecek suv miqdarı 234 milliard kubometr teşkil etmekte ve bu miqdar Qırımnı kurort sezonınıñ soñuna qadar temin etmege yetecek eken.
Rusiye Qırımnı istilâ etken soñ, yarımadanı Dnepr özeninen bağlağan yekâne suv yolağı olğan Şimaliy-Qırım kanalından suv berilmesi kesilgen edi.
Dneprden kelgen suv kesilmesi neticesinde suvarıluv vastasınen asralğan Qırım ziraatçılığı çoq zarar körgen edi. Qırımnıñ suvarılğan 140 biñ gektar toprağından yerli suv imkânlar qullanaraq suvarılğan yalıñız 17 biñ gektar topraq qaldı. Artıq pirniç asralmay. Bir yıldan soñ suvarılğan topraq alanı 13,4 biñ gektarğace tüşti.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
