Link açıqlığı

Qırım Yuqarı Şurası qarşısında 2014 senesi fevralniñ 26-nda ötkerilgen mitingte silâlanğan şahsiy şirketlerniñ vekilleri iştirak etken edi. Bunı iyülniñ 16-nda «Çiygoz davası» esnasında mahkeme toplaşuvınıñ teneffüsinde rusiyeli advokat Nikolay Polozov beyan etti.

Polozovnıñ video-muracaatını öz Facebook saifesinde qırımtatar milliy areket faili Zair Smedlâyev yayınladı.

Advokatnıñ sözlerine köre, Çiygoznıñ tutulmasından bir kün evel ve tutulğan künü de Qırımda Rusiyeniñ FSB hızmeti ve politsiyası tarafından taqiqatçığa yollanılğanmalümat ve ameliyat-aqtaruv tedbirlerinen bağlı vesiqalarda Ahtem Çiygoz aqqında yañlış bilgiler bar edi.

«Meraqlı bir vesiqa Aqyardan yollanılğan edi. Onda aytıla ki, 2014 senesi fevralniñ 26-nda yüz bergen vaqialarda Aqyar şeerinden eki teşkilât iştirak etken: olardan birisi – «Çörnoye more» («Qara deñiz») adlı silâlanğan şahsiy şirket, ekinci silâlnğan teşkilât – «Terskoye kozaçestvo Sevastopolâ». Böyle etip, fevralniñ 26-nda yüz bergen vaqialarda arbiyler ve şahsiy arbiy şirketler iştirak etkenlerini aytabilemiz», – dedi Polozov.

O qayd etti ki, «davanıñ malümatlarında, taqiqatçı bu vaziyetni taqiq etmege tırışqanına dair iç bir malümat yoq. O buña emiyet bermedi, çünki bu «qabaat iddiasınıñ mantığına iç te uymay».

Advokatnıñ sözlerine köre, mahkeme toplaşuvı vaqıtında Ahtem Çiygozğa destek olaraq imzalanıp, Qırımnıñ çeşit regionlarında toplanılğan arizalar talil etilgen.

«Episi olıp tahminen 50 saife talil etildi, olarda yüzlernen adamnıñ imzaları mevcut, ve bunıñ episi Çiygoznın Qırım sakineri arasında qazanğan itibarını köstermekte», – dep yekünledi Polozov.

Kreml kontrol etken işğal altındaki Qırımnıñ Yuqarı mahkemesi iyünniñ 22-de Ahtem Çiygoznıñ apiste yatma müddetini üç ayğa – oktâbrniñ 8-ne qadar uzattı. Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG