Link açıqlığı

Rusiyeniñ Qırımdaki prokuraturası «yasaqlanğan Mecliske» ne yapacağını mahkemeden soray – fail


İşğal etlgen Qırımda Rus prokuraturası, Kremlge tabi olğan Qırım Yuqarı mahkemesine muracaat etip, Rusiyede ve istilâ etilgen Qırımda yasaq etilgen Qırımtatar Milliy Meclisine nisbeten nasıl davranmaq kerek olğanını soray. Nezaret organı bu sualni, BMT Halqara mahkemesinde qabul etilgen qarar sebebinden soray. Malüm ki, Halqara mahkeme qırımtatarlarnıñ temsil organınıñ faaliteine musaade etmege emir etken edi.

Prokutura tarafından yollanılğan vesiqanıñ nushasını Facebookta qırımlı fail Nariman Celâl derc etti. Muracaatnıñ nushası oña da kelgen, çünki 0 Meclisniñ yasaqlanması boyunca mahkeme esnasında cevapkârnıñ temsilcisi olaraq iştirak etken edi.

Nariman Celâl bu vesiqanı Qırım.Aqiqat içün böyle izaatladı: «BMT Halqara mahkemesiniñ qararı ilân etilgeninden üç ay keçti, ve ancaq üç ay soñra Qırımdaki prokuratura, mahkeme qararına nisbeten nasıl davranmaq kerek olğanını añlamağa tırışa ve Qırımtatar Milliy Meclisi adınen cemaat birleşmesi teşkil etilmek mümkünmi, dep soray».

Qırımdaki Rus prokuraturasınıñ web-sitesinde Yuqarı mahkemege yollanılğan muracaat aqqında malümat yoq.

Rusiyege bağlı olğan Qırım Yuqarı Mahkemesi aprelniñ 26-nda Meclisniñ areketini toqtatmaq qararını alğan edi. Meclisniñ imayesi Rusiye Yuqarı Mahkemesine şikâyet arizasını yollağan edi. Sentâbrniñ 29-nda Rusiye Aliy Mahkemesi şikâyet arizasına cevap olaraq Qırımtatar Milliy Meclisiniñ faaliyetini yasaq etti.

Aprelniñ 19-nda Birleşken Milletler Teşkilâtınıñ Halqara mahkemesi Ukrainanıñ Rusiyege qarşı açqan davasında muvaqqat qarar qabul etken edi. Gaagadaki mahkeme, terrorizmge maddiy destekniñ berilmesine qarşı Halqara añlaşma esasında Rusiyeni muvaqqat tedbirlernen cezalamağa razı olmadı. Amma Moskvanı qırımtatarlarnıñ ve etnik ukrainlilerniñ aqlarını sıñırlamaqtan vazgeçmege, Meclisniñ faaliyetini devam ettirmege ve istilâ etilgen Qırımda ukrain tilinde tasil berüvni tiklemege mecbur etti.

XS
SM
MD
LG