Link açıqlığı

Saatnıñ esas haberi

Çiygoznıñ imayesi: mahkeme Qırım müftisi Ablayevni sorğuğa çekmege istemey


Emirali Ablayev
Emirali Ablayev

Kreml kontrol etken Qırım Yuqarı mahkemesiniñ qırımtatar milliy areketi liderleriniñ birisi Ahtem Çiygoz davasınıñ oturışında advokat Nikolay Polozov mahkeme Qırım müftisi Emirali Ablayevni sorğuğa çekmege istemey, dep bildirdi. Radio Svoboda mühbiri Anton Naumlükniñ Qırım.Aqiqatqa bildirgenine köre, Çiygoznıñ imayesi qadılarnı çetleştirmege rica etti.

«Mahkeme müfti Emirali Ablayev esnas iştirakçilerine basqı yapqanından haberdar olğan soñ eñ azından meseleni ögrenmek kerek edi. Bizler onı mahkemege çağırıp, bunı soracaq edik. Mahkeme Ablayevniñ ayta bileceklerinden bir şeyler cemaatçılıqtan saqlamağa istey, belki. Mahkeme Ablayevge söz bermemek içün sebep köre. Bizler müftiniñ aytacaqlarını bilmeymiz, amma prokuror, mahkeme biledir, ve buña yol bermeycek olalar», – dep añlattı Polozov.

Ahtem Çiygoz mezkür muracaatqa qoltutıp, «mahkeme mustaqil yanaşmağanını» bildirdi. Onıñ aytqanına köre, üç Meclis azasından ekisini (Remzi İlyasov ve Emirali Ablayevni – QA) mahkeme sorğuğa çekmege razı olmadı, «çünki diger taraftan kelgen emirlerge köre areket ete». Çiygoznıñ qayd etkenine köre, qayd etilgen Meclis azalarından iç birisi teşkilâttan çıqacağına dair ariza yazmağan edi.

«Emirali Ablayev Rusiye akimiyeti ve, hususan, hızmetlernen işbirligine başladı. Qırımtatarlar arasında ekstremist ve terroristlerni tapmaq içün Rusiye mahsus hızmetlerine yardım ete. Mahsus hızmetler mahkememizge basqı yapa. Mahsus hızmetler davağa kirişse, uquqiy boşluq kerginleşe. Mahkeme mustaqil degil», – dep qayd etti advokat.

«Belli bir şaatlarnıñ sorğuğa çekilmemesi mahkemeniñ qabaat qararına bağlı olğanını ifadeley», – dep qoltuttı muracaatqa advokat Aleksandr Lisovoy.

Mahkeme çetleştirilmesine dair muracaatnı qanaatlendirmedi. Baş qadı «bunıñ temeli yoq», dep ayttı.

«Çiygoz davasınıñ» mahkeme oturışına Qırımnıñ Rusiye parlamentiniñ spikeri Vladimir Konstantinov kelmedi.

Kreml kontrol etken Qırım Yuqarı mahkemesi iyülniñ 5-de qırımtatar milliy areketi liderlerinden birisi Ahtem Çiygoznıñ imayesine müfti Emirali Ablayevni sorğuğa çekmege izin bermedi. Qadılar «imayeniñ muracaatı temelsiz» olğanını ayttılar.

Kreml kontrol etken Qırım Yuqarı mahkemesi iyünniñ 27-de olıp keçken oturışında qırımtatar milliy areketi liderleriniñ birisi Ahtem Çiygoz imayesiniñ Qırım müftisi Emirali Ablayevni sorğuğa çekmek muracaatını red etken edi.

Kreml kontrol etken işğal altındaki Qırımnıñ Yuqarı mahkemesi iyünniñ 22-de Ahtem Çiygoznıñ apiste yatma müddetini üç ayğa – oktâbrniñ 8-ne qadar uzattı. Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG