Link açıqlığı

Qırım parlamentiniñ spikeri Konstantinov «Çiygoz davasınıñ» mahkeme oturışına kelmedi


Vladimir Konstantinov

Kreml kontrol etken Qırım Yuqarı mahkemesiniñ qırımtatar milliy areketi liderlerinden birisi Ahtem Çiygoz davasınıñ iyülniñ 10-da olğan oturışına Qırımnıñ Rusiye parlamentiniñ spikeri Vladimir Konstantinov kelmedi. O, şaat olaraq sorğuğa çekilecek edi. Bunı Radio Svoboda mühbiri Anton Naumlük Qırım.Aqiqatqa bildirdi.

Mahkemede seslendirilgen Konstantinovnıñ haberine köre, o, iyülniñ 12-de oturışqa kelmege vade etti.

Bundan ğayrı, mahkeme imayeniñ Qırım müftisi Emirali Ablayevni şaat olaraq sorğuğa çekmek muracaatını kene red etti. Advokat Nikolay Polozovnıñ aytqanına köre, Ablayev 2014 senesi fevralniñ 26-da olğan mitingniñ teşkil etilmesi ve keçirilmesini añlata bile. O, mitingde iştirak etken edi. Bundan ğayrı, dava mabüsleri Ablayev olarğa basqı yapıp, Çiygozğa qarşı şaatlıq ettirmege tırışqanını aytqan ediler.

«Qırım müftisi musulmanlar olaraq mahkemege kelip, doğru şaatlıq etmek kerek. Diniy işançlarına köre böyle olmalı», – dep qayd etti advokat.

Qadılar Ablayevni çağırmamağa qarar aldı, çünki «imaye Ablayev bere bilecek tam bir malümatnı qayd etmegen eken». Advokat mahkeme areketlerine qarşı narazılıq bildirdi.

«Ablayevniñ immuniteti bar, belki? O, FSB, akimiyet ile añlaşıp, davada iştirak etmemek içün imaye alğanmı?», – dep ayttı Polozov.

Kreml kontrol etken Qırım Yuqarı mahkemesi iyülniñ 5-de qırımtatar milliy areketi liderlerinden birisi Ahtem Çiygoznıñ imayesine müfti Emirali Ablayevni sorğuğa çekmege izin bermedi. Qadılar «imayeniñ muracaatı temelsiz» olğanını ayttılar.

Kreml kontrol etken Qırım Yuqarı mahkemesi iyünniñ 27-de olıp keçken oturışında qırımtatar milliy areketi liderleriniñ birisi Ahtem Çiygoz imayesiniñ Qırım müftisi Emirali Ablayevni sorğuğa çekmek muracaatını red etken edi.

Kreml kontrol etken işğal altındaki Qırımnıñ Yuqarı mahkemesi iyünniñ 22-de Ahtem Çiygoznıñ apiste yatma müddetini üç ayğa – oktâbrniñ 8-ne qadar uzattı.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG