İşğal etilgen Qırımda Rus mahkemesi Bağçasarayda keçirilgen tintüvlerniñ şaatı Osman Belâlovğa qarşı «izinsiz miting» iddiasınen açılğan davanı, maznunnıñ özü ve advokatı olmasalar da, özü baqtı. Bunı iyülniñ 6-nda Qırım.Aqiqatqa bergen izaatında qırımlı fail Server Mustafayev bildirdi.
«Şimdi belli oldı ki, keçken cuma künü (iyünniñ 30-nda – QA) mahkeme davanı maznunsız ve imayecisiz baqqan ve qabul etken qararını poçta vastasınen yollağan. Advokarlar buña qarşı itiraz bildirmege niyetli. Mahkemede bulunıp olamağanlarınıñ ciddiy sebepleri ve pekitilgen biletleri ne içün diqqatqa alınmadı?», – dedi Mustafayev.
Onıñ sözlerine köre, Rus mahkemesiniñ qararı Belâlovğa daa yetip kelmedi.
Qırımtatarlarnıñ evlerinde keçirilgen tintüvlerniñ şaatı Osman Belâlovnıñ advokatı iyünniñ 30-nda, iş yollanması sebebinden, mahkeme oturışını başqa künge avuştırmağa rica etken edi.
Bu davanıñ birinci oturışı salı künü, iyünniñ 27-de, keçirilecek edi, lâkin «mahkemeniñ işi çoq olğanı içün» cuma künü, iyünniñ 30-na, avuştırılğan edi.
İyünniñ 28-de Qırım faali Server Mustafayev Osman Belâlov «qanunsız mitingde» iştirak etkeni içün 30 künge apiske alına ya da 150 biñden 300 biñ rublege qadar (66 biñden 132 biñ grivnağa qadar – QA) para cezasını ala bile, dep bildirgen edi.
Martnıñ 7-de Kreml kontrol etken Qırım mahkemesi Bağçasarayda keçirilgen tintüvlerniñ şaatı Osman Belâlovnıñ şikâyet arizasını qanaatlendirmedi. Onı qanunsız kütleviy aktsiyada iştirak etmesinde qabaatlaylar.
Yanvar ayınıñ soñunda Bağçasaraydaki Rusiye mahkemesi Osman Belâlovğa 10 biñ ruble miqdarında para cezasını berdi.
Mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
