Link açıqlığı

Qırımda Bağçasaraydaki tintüvlerniñ şaatı boyunca mahkeme başqa künge avuştırıldı – Qırım faali


Kreml kontrol etken Bağçasaray mahkemesi qırımtatarlarnıñ evlerinde keçirilgen tintüvlerniñ şaatı Osman Belâlovnıñ mahkeme oturışını advokat iş yollanmasında olğanı içün başqa künge avuştırıldı. Bunı Qırım faali Server Mustafayev iyünniñ 30-da Qırım.Aqiqatqa bildirdi.

«Tünevin (iyünniñ 29-da – QA) Belâlovnıñ advokatı iş yollanması sebebinden mahkeme oturışınıñ başqa künge avuştırılması içün muracaat yazdı. Qaytqan soñ kelecek oturışnıñ künü belli olacaq», – dedi Mustafayev.

Bu davanıñ birinci oturışı salı künü, iyünniñ 27-de, keçirilecek edi, lâkin «mahkemeniñ işi çoq olğanı içün» cuma künü, iyünniñ 30-na, avuştırılğan edi.

İyünniñ 28-de Qırım faali Server Mustafayev bildirdi ki, Osman Belâlov «qanunsız mitingde» iştirak etkeni içün 30 kün memuriy apis cezasını ya da 150 biñden 300 biñ rublege qadar (66 biñden 132 biñ grivnağa qadar – QA) para cezasını ala bile.

Martnıñ 7-de Kreml kontrol etken Qırım mahkemesi Bağçasarayda keçirilgen tintüvlerniñ şaatı Osman Belâlovnıñ şikâyet arizasını qanaatlendirmedi. Onı qanunsız kütleviy aktsiyada iştirak etmesinde qabaatlaylar.

Yanvar ayınıñ soñunda Bağçasaraydaki Rusiye mahkemesi Osman Belâlovğa 10 biñ ruble miqdarında para cezasını berdi.

Mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG