Ukraina prezidenti Petro Poroşenko «Ukrainanıñ tışqı siyasetine dair bazı Ukraina qanunlarına deñişmelerniñ kirsetilmesi aqqında» Ukraina qanunı imzaladı. Yuqarı Radada bu qanun 2017 senesi iyünniñ 8-nde qabul etilgen edi.
Bu qanun ile «Ukrainanıñ milliy telükesizlik esasları aqqında» ve «İçki ve tıqşı siyasetiniñ temelleri aqqında» Ukraina qanunlarına Avropa-Atlantik integratsiyasına dair deñişmeler qabul etile.
«Qanunğa binaen, Avropa-Atlantik itifağına qoşulmaq ve NATO azası olmaq – Ukraina milliy menfaatlarınıñ prioritetlerinden biri ola. Bu maqsatqa irişmek içün Ukraina bütün kerekli islâatlarnı kerçekleştirecek, şu cümleden mudafaa ve telükesizlik saasında İttifaq azalarınıñ kriteriylerine uymaq içün areket etecek», – dep aytıla prezidentniñ sitesinde yerleştirilgen bildirüvde.
Vazifesini qaldırıp, qaçıp ketken sabıq prezident Viktor Yanukoviç tarafından 2010 senesi qabul etilgen bitaraf statusını red etmek içün 2014 senesi dekabr ayında Ukraina Yuqarı Radası prezident Petro Poroşenko tarafından teklif etilgen mahsus qanun leyhasını desteklegen edi. Bitaraf statusından vazgeçken olsa da, şimdige qadar Ukraina tam olaraq NATO azası olmaq içün alınğan muayyen bir tedbirlerni ğayırdan başlatmağan edi, albu ki 2004 senesi devlet yolbaşçısı Leonid Kuçma olğanda baş nazir Yanukoviç tarafından böyle bir programma azırlanılğan edi.
Şimdige qadar Kyiv öz tarafından NATO ile çeşit saalarda işbirlik yapmaq ve Avropa-Atlantik itifağınıñ standart ve ümdelerini menimsemek vazifelerinen sıñırlana edi. Öz tarafından NATO temsilcileri qayd eteler ki, Ukrainanıñ mevamı deñişmey: Ukraina ittifaq azası ola bile, bunıñ içün Kyiv tarafından kerekli şartlar eda etilmeli ve istek bildirilmeli. Amma Rusiye «Ukraina NATO azası olmaycağını tasdiqlaycaq kefaletnıñ berilmesini» talap ete.
İyünniñ 5-nde Montenegro devleti resmiy olaraq NATO-nıñ 29-ncı azası oldı. Rusiye ve Qaradağdaki Rusiye tarafdarları olğan firqalar buña qarşı çıqqan edi.
