Link açıqlığı

Yaltalı «Hizb ut-Tahrir davasınıñ» mabüsi Kukuğa bir kere bile tuvğanlarınen körüşmege izin bermediler – uquq qorçalayıcılar


Emir-Üsein Kuku davasında şikâyet arizasınıñ baqılması, arhiv fotoresimi

Bir yıldan ziyade Rusiye akimiyeti tarafından SİZOda tutulğan Qırım uquq qorçalayıcısı, «Hizb ut-Tahrir davasınıñ» mabüsi Emir-Üsein Kuku tuvğanlarınen körüşmek içün bir kere bile izin alamadı. Ömür arqadaşı Meryem Kuku aqayını körmek içün bir qaç kere yazma şekilde muracaat etken edi. Bunı iyülniñ 3-de Qırım uquq qorçalayıcı gruppası haber ete.

Uquq qorçalayıcılarnıñ malümatına köre, Rusiye FSB taqiqatçısı Mahnev S.V. yazma şekilde bergen red cevaplarında 1995 senesi iyülniñ 15-de çıqqan N 103-FZ «Cinayet işlemesinde şeklengen ve qabaatlanğanlarnıñ nezaret altında tutulması aqqında» Rusiye federal qanunınıñ 18-inci maddesine esaslana, lâkin tam bir sebebini qayd etmey.

Kukunıñ imayecisi Aleksey Ladin bunıñ kibi red cevaplarını qanunsız dep saya.

«Evelden qorantası mahkeme oturışlarında onı ara-sıra köre edi, şimdi ise oturışlar qapalı şekilde keçirile. İmaye bundan Rusiye mahkemesinde şikâyet etmege, soñra ise Avropa insan aqları mahkemesine şikâyet arizasını bermege planlaştıra», – dep tarif etti Ladin.

İyün ayında Emir-Üsein Kuku Latviya ukrainleri kongressinden qoltutuv mektübini aldı.

Kreml kontrol etken işğal etilgen Qırımnıñ Yuqarı mahkemesi iyünniñ 23-de «Hizb ut-Tahrir davasınıñ» mabüsi Emir-Üsein Kukunıñ apiste yatma müddetiniñ arttırılmasından bergen şikâyet arizasını red etti.

Yaltalı «Hizb ut-Tahrir davasınıñ» mabüsi, İnsan aqları bağ gruppasınıñ azası Emir Üsein Kuku 2016 senesi fevralniñ 11-de tutulğan edi.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG