Link açıqlığı

Ukraina topraq bütünligine qoltutuv mitingde iştirak etkeni içün mahküm etilgen qırımtatar halqı liderleriniñ birisi Ahtem Çiygoznıñ advokatları yarımadanıñ şimdiki akimiyetinden oña iyülniñ 2-de vefat etken anasınen sağlıqlaşmağa imkân bermesini talap etecek ola. Bunı Çiygoznıñ advokatı Nikolay Polozov iyülniñ 2-de Facebook saifesinde yazdı.

«Ahtem Çiygoz is etken acını körem ve is etem, onı añlayım. Rusiye akimiyetine daa bir kere muracaat etip, insaflıq köstermege ve Ahtem Çiygozğa oğul vazifesini becermege, anasını soñki yolğa ozğarmağa imkân bermege çağıram. Çiygoz Aliye Abduraimovanıñ cenazesinde oña ibadet etmege imkân berilmesini rica etem», – dep yazdı Polozov.

Qırımtatar Milliy Meclisiniñ reisi Refat Çubarov da Çiygozğa vefat etken anasınen vedalaşmağa imkân berilmeli, dep bildirdi.

«Musulman ananelerine köre, Aliye abla bugün kün batqanına qadar defin etilmeli. Ahtem Çiygozğa anasını soñki yolğa ozğarmaq ve cenazesinde olmaq imkânı berilsin dep, advokatlar Reglamentniñ 39-ıncı qaidesine köre Avropa insan aqları mahkemesine muracaat ete bileler», – dep yazdı Çubarov.

Qırımtatar faali Nariman Celâl cenaze iyülniñ 2-de saat 14.00 Bağçasaray rayonınıñ Topçiköy (Dolinnoye) köyünde qılınacaq, dep yazdı.

İyünniñ 15-de Kreml kontrol etken Qırım Yuqarı mahkemesi eki buçuq yıldan berli SİZOda yatqan Ahtem Çiygoznıñ imayesi bergen hasta anasınen körüşme muracaatını red etken edi.

Bundan evel Qırımtatar Milliy Meclisiniñ reisi, Ukraina halq deputatı Refat Çubarov Qırımnıñ siyasiy mabüsi Ahtem Çiygoznıñ anası hasta olğanını haber etken edi.

İyünniñ 20-de Ahtem Çiygoznı Aqmescit SİZOsından gizli şekilde çıqarıp, Bağçasarayda hasta anasınen körüşmege imkân berdiler. Ahtem Çiygoz izolâtorğa keri ketirildi, anasınen körüşken soñ mahkeme oturışına devam etip olamadı.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.


XS
SM
MD
LG