Link açıqlığı

Saatnıñ esas haberi

Rusiyede apiske alınğan Zeytullayev şikâyet arizasınıñ baqılması ögüne üçünci kere açlıq ilân etmege niyetlene – ömür arqadaşı


Ruslan Zeytullayev
Ruslan Zeytullayev

Rusiyede tutulğan «Hizb ut-Tahrir davasınıñ» mabüsi Ruslan Zeytullayev onıñ davası boyunca şikâyet arizasınıñ baqılması ögüne üçünji açlıq ilân etmege niyetlene. Bunı ömür arqadaşı Mergem Zeytullayeva ile soñki körüşüvinde ayttı.

«O, şikâyet arizası baqılğanda da açlıq tutacağını ayttı. 7-8 kün ögüne haber etmege rica etti, üçünci açlıqnı ilân etecek, dep añladım. Bekleymiz», – dedi Mergem Zeytullayeva iyülniñ 1-de «Qırım birdemligi» birleşmesiniñ toplaşuvında.

O, soñki sefer aqayını aprel ayında körgenini qoştı. O vaqıttan berli bağ yoq, ve Ruslannıñ alını bilmey.

İyülniñ 1-de Qırımda «Qırım birdemligi» birleşmesiniñ daa bir toplaşuvı olıp keçti. Qırım.Aqiqat onı canlı yayında kösterdi.

Bağçasarayda «Qırım birdemligi» birleşmesiniñ toplaşuvı, 2017 senesi iyülniñ 1-i
Bağçasarayda «Qırım birdemligi» birleşmesiniñ toplaşuvı, 2017 senesi iyülniñ 1-i

«Hizb ut-Tahrir davasınıñ» mabüsi Ruslan Zeytullayev mayısnıñ 26-da mubarek Ramazan ayında oraza tutmaq içün açlıqnı toqtattı.

Ekinci açlıqqa evelkinden 19 künden soñ başladı.

Birinci açlıqnı aprelniñ 4-de Rostov-na-Donudaki Şimal-Kavkaz bölge arbiy mahkemesinde üküm çıqarılğanına qadar ilân etken edi.

Aprelniñ 26-da Rusiyeniñ Şimal-Kavkaz bölge arbiy mahkemesi «Hizb ut-Tahrir davasınıñ» mabüsi Ruslan Zeytullayevni 12 yılğa azatlıqtan marum etti.

Rostov-na-Donu şeerindeki Şimal-Kavkaz bölge arbiy mahkemesi 2016 senesi sentâbrniñ 7-de Zeytullayevni «terrorist cemiyette iştirak etkeninde» qabaatlı olaraq tanıp, oña 7 yıl apis cezasını berdi. Rusiye prokuraturası Rusiye Yuqarı mahkemesiniñ bu qararına itiraz bildirdi ve dava tekrar baqılması içün kene Şimal-Kavkaz bölge arbiy mahkemesine qaytarıldı. Taqiqat organları Zeytullayevnıñ terrorist cemiyet iştirakçisi degil de, teşkilâtçı olaraq tanılmasını istey. Rusiye Ceza Kodeksiniñ bu maddesi eñ azından 15 yıl ve atta ömür boyu apis cezasına ketirmek mümkün.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG