Link açıqlığı

Qırımdaki Elif bala merkezinde keçirilgen tintüvlerni qırımtatarca köstergen faaliyetlerinen bağlaylar


Elif bala merkeziniñ reberi Lutfiye Zudiyeva Rusiye uquq qoruyıcılarnıñ merkez ziyareti qırımtatarca köstergen faaliyetlerinen bağlı olğanını tahmin ete. Bunı Zudiyeva iyünniñ 30-da Qırım.Aqiqatqa bildirdi.

«Merkezimizge o qadar diqqat ayırıla, 2016 senesi yanvar ayından berli üçünci teşkerüv, biz ise 2015 senesi oktâbr ayında açıldıq, menim fikirimce, bunıñ sebebi qırımtatar tilinde köstergen faaliyetimiz ola», – dedi Zudiyeva.

Onıñ aytqanına köre, Rusiye uquq qoruyıcıları yasaqlanğan saytlarnıñ cedvelini asıp qoymağa talap etti.

«Bütün bular, hususan dört ve altı yaşında balaçıqlar içün levhağa «yasaqlanğan saytlarnıñ cedvelini» asma talabı o qadar kederli olmasa edi, külkünçli olur edi», – dep qoştı o.

Qırım advokatı Emil Kürbedinov iyünniñ 30-da Rusiye uquq qoruyıcılarınıñ Canköydeki Elif qırımtatar bala merkezi ziyareti aqqında haber etti.

Kreml kontrol etken Qırım prokuraturası ve yarımadanıñ diger işğalci uquq qoruyıcı organlarınıñ saytlarında bunıñnen bağlı bir haber yoq.

Rusiye uquq qorçalayıcısı, Qırımdaki uquq qorçalayıcı alan merkeziniñ koordinatorı Aleksandra Krılenkova bildirgenine köre, fevralniñ 16-da Canköydeki Elif bala merkezine kelgen prokuratura vekilleri «vatandaşlarnıñ muracaatını baqma» çerçivesinde vesiqalarnı köstermege talap etken edi.

Yanvarniñ 27-de uquq qoruyıcılar Elif merkezinden qırımtatarca ve türkçe basılğan edebiyatnı alıp ketken edi.

Elif qırımtatar bala merkezi 2015 senesi işke başlap, Rusiye qanunlarına köre qayd olğan edi. 2 yaşından 6 yaşına qadar aman-aman 20 bala merkezge qatnay.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG