Dünya qırımtatar kongressi icra komitetiniñ doquzıncı toplaşuvı iyül ayınıñ soñunda Kyivde keçirilip, Qırım halq cumhuriyetiniñ yüz yıllığınen bağlı tedbirlerniñ ötkerilmesine bağışlanacaq. Bunı BDQK prezidenti ve Qırımtatar Milliy Meclisiniñ reisi Refat Çubarov Qırım.Aqiqatqa bildirdi.
«Birinci Qırımtatar Milliy Qurultayı ve Qırım halq cumhuriyeti qurulmasınıñ yüz yıllığına bağışlanğan halqara tedbirlerniñ keçirilmesini, bu cumhuriyetniñ ükümet saylanmasını muzakere etecekmiz, o eski taqvimge köre 1917 senesi oktâbr ayınıñ soñunda olğan edi. Bu ükümetniñ reisi Qırım musulmanları müftisi Noman Çelebicihan saylanğan edi. Bu tedbirler em diaspora, em bütün qırımtatar halqı içün müim olıp, dünya toplulığınıñ ve halqımıznıñ diqqatını şimdiki vaziyetke celp etecek. İyül ayınıñ soñuna planlaştıramız, o, (toplaşuv – QA) kene Kyivde keçirilecek», – dedi Çubarov.
1917 senesi Qurultay qırımtatar devletçiligini ğayrıdan tiklep, Noman Çelebicihan yolbaşçılığında Qırım halq cumhuriyetini ilân etken edi. Bolşevik ordusı qırımtatarlarnıñ devletçiligini ğayrıdan tikleme ıntılışını bastırıp, Çelebicihannı öldürgen edi.
BDQK Qırım tışında yaşağan qırımtatar teşkilâtlarını birleştirmekte. BDQK icra komitetiniñ keçken toplaşuvı aprel ayında Kyivde keçirilgen edi. Kün tertibindeki esas noqtalardan biri Gaagadaki Birleşken Milletler Halqara mahkemesiniñ qararı oldı. O, Rusiyeni işğal etilgen yarımadada Qırımtatar Milliy Meclisiniñ faaliyetini ğayrıdan tiklemege mecbur ete.
