Link açıqlığı

Qırımdaki mahkeme Aqmescitli «Hizb ut-Tahrir davasınıñ» mabüsleri bergen şikâyet arizasını qanaatlendirmedi


Kreml kontrol etken Qırım Yuqarı mahkemesi «Hizb ut-Tahrir davasınıñ» beş Aqmescitli mabüsi apis cezasınıñ uzatılmasından bergen şikâyet arizasını red etti. Bunı Qırım advokatı Emil Kürbedinov iyünniñ 28-de Qırım.Aqiqatqa bildirdi.

«Mahkeme şikâyetlerimizni kene qanaatlendirmedi. Bu oturış ceza-protsessual kodeksi ve halqara uquqqa zıt bir şekilde keçirildi. Dava qapalı mahkeme oturışında baqıldı. Dava malümatlarında mahkeme qararı bar edi, prokuror Rusiyede kerçekleştirilgen terrorist ücümlerinden sebep bir de bir qalabalıq çıqacağından qorqıp, Rusiyedeki istiqrarsız içtimaiy-siyasiy vaziyetke esaslana. Bu sebepten oturışnı qapalı şekilde keçirmege rica etti», – dep tarif etti advokat.

Onıñ aytqanına köre, Qırımdaki Rusiye mahkemesi imaye tarafınıñ iç bir deliline emiyet bermedi.

Aqmescitniñ Kiyev rayon mahkemesi «Hizb ut-Tahrir davasınıñ» beş mabüsi Emil Cemadenov, Uzair Abdullayev, Teymur Abdullayev, Ayder Saledinov ve Rustem İsmailovnıñ apiste yatma müddetini üç ayğa uzatqan edi. Advokatlar şikâyet arizasını berdi, lâkin onıñ baqılması eki kere avuştırılğan edi.

2016 senesi oktâbrniñ 12-de Qırımda beş qırımtatar qorantasınıñ evinde tintüv keçirildi. Tintüvler neticesinde beş qırımtatarı tutuldı, olarnı Rusiyede yasaqlanğan «Hizb ut-Tahrir» teşkilâtında iştirak etmesinde qabaatlaylar: Rustem İsmailov, Uzair Abdullayev, Teymur Abdullayev, Emil Cemadenov, Ayder Saledinov.

Fevral ayınıñ soñunda belli oldı ki, Rustem İsmailov ve Ayder Saledinovnı psihiatrik ekspertizağa yolladılar. Bundan evel Müslim Aliyev, Vadim Siruk, Enver Bekirov, Emir-Üsein Kuku, Arsen Cepparov, Refat Alimov, Remzi Memetov ve Enver Mamutov psihiatrik ekspertizadan keçken ediler.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.


XS
SM
MD
LG