Canköyniñ beş sakini Rusiye politsiyasına 2017 senesi mayısnıñ 18-de keçirilgen tedbirlerde iştirakini añlatsın dep çağırıldı. Şeerdeki eki abidege çeçek qoyğanları aqqında laf kete. Bunı iştirakçilerden biri Ruslan Kurtseitov iyünniñ 22-de Qırım.Aqiqatqa bildirdi.
«Olar bizni Rusiye memuriy cinayetler kodeksiniñ 20-nci maddesiniñ 2-nci qısmında (Toplaşuv, miting, numayış, yürüş ya da piket keçirilmesi ya da teşkil etilmesi nizamını bozuv) qabaatlaylar. Biz ise anda ne miting, ne de yürüş olmağanını aytamız. İnsanlar kelip çeçek qoydı, taştan vokzalğa yol alıp, tahtağa çeçek qoydılar. Bunı miting, yürüş dep saydılar, beş insan politsiyağa çağırıldı», – dep añlattı Kurtseitov.
Onıñ bildirgenine köre, çeçek qoymağa kelgen qırımtatarlar yerli Qırım akimiyeti planlaştırğan miting aqqında bilmey edi.
«Saat 10:00-da yerli akimiyet miting keçirip, çeçek qoyğan eken. Amma bizni tenbiyelegenleri yoq. Biz bilmey edik. 30 yıldan berli çeçek qoymağa baramız. Soñra Aqmescitteki mitingge bara edi», – dedi Kurtseitov.
Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebook saifesinde 2017 senesi mayısnıñ 18-de Canköyde çeçek qoyulğanınen video yerleştirgen edi.
Onıñ aytqanına köre, politsiya hadimleri davalarnı mahkemege bermege istey. Mahkeme olarnı qabaatlı dep tanısa, Canköyniñ beş sakini 10 biñden 30 biñ rublege qadar para cezasını ala bile.
Qırımnıñ Rusiye İçki işler nazirliginiñ açıq menbalarında Canköy sakinleriniñ politsiya idaresine çağırılmasına dair bir malümat yoq.
Esas Ukraina, işğal etilgen Qırım ve dünyanıñ bir çoq memleketinde mayısnıñ 18-de 1944 senesi qırımtatar halqı sürgünliginiñ qurbanlarını añma merasimleri olıp keçti. Şu künü 1944 senesiniñ facialı adiselerini añdılar. Qırımdan 200 biñden ziyade qırımtatarı sürgün etilgen edi.
Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı.
Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı.
Bunıñnen beraber, TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
