Kremlniñ nezaretindeki Qırım Yuqarı Mahkemesi iyünniñ 28-nde Ahtem Çiygoznıñ davasında şaat olaraq Kreml kontrol etken Qırım milletlerara munasebetler ve sürgün olunğan vatandaşlar meseleleri komitetiniñ reisi Zaur Smirnovnı sorğudan keçirdi.
Qırım.Aqiqat muhbiriniñ bildirgenine köre, Qırım Yuqarı Radasınıñ binası qarşısında 2014 senesi fevralniñ 26-nda ötkerilgen mitingniñ bütün mesuliyetini Smirnov Meclisniñ reisi Refat Çubarovğa yükledi. Şaatnıñ sözlerine köre, Çubarov mitingni şahsen özü teşkil etti ve Meclis azalarınıñ rey berüvini keçirmedi.
«O (Refat Çubarov – QA) dedi ki, sessiyanıñ keçirilmesine imkân bermege mümkün degil, çünki o devletke qarşı olğan bir şekilde keçirilecek edi. O ABD elçihanesiniñ fikirine esaslana edi, o olarnen er daim bağda edi, onıñ qızı o vaqıt anda çalışa edi. O andan emirler alıp, demokratiya tarafdarlarınıñ fikiri olaraq seslendire edi. Fevralniñ 25-nde Meclisniñ toplaşuvında o bu mitingniñ keçirilmesini qabul etilgen qarar olaraq seslendire edi. Yani vaziyet açıq-aydın tıştan idare etile edi, bu sebepten Çubarov nizamsızlıq ve qan töküviniñ yaratılması içün bir alet edi», – dedi Smirnov.
Smirnovnıñ sözlerine köre, miting vaqıtında o Çubarovnen beraber Radanıñ binası içinde buluna edi. Bundan soñ, parlament toplaşuvı ötkerilmeycegi belli olğan soñ, olar qapı aldına çıqıp, Çubarov beyanat seslendirdi ve er kesni dağılmağa çağırğan. Fevralniñ 26-nda Ahtem Çiygoznıñ yapqan areketleri aqqında şaat iç bir şey aytıp olamadı.
İleride mahkeme Ahtem Çiygoz davası çerçivesinde Kremlniñ itaarındaki Qırm parlamentiniñ reisi Vladimir Konstantinovnı ve deputat Lentun Bezaziyevni soraştırmaq niyetinde olğanı haber etile.
Keçende Zaur Smirnovnıñ sorğusı endi başlanğan edi, lâkin Ahtem Çiygoz, apishanede bulunıp mahkemede uzaqtan iştirak etkeni vaqıtında, onnen qurulğan bağ bozulğanı sebebinden sorğu keçiktirilgen edi.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
