Kreml kontrol etken Qırım Yuqarı mahkemesi qırımtatar milliy areketi liderleriniñ birisi Ahtem Çiygoznıñ imayesine Qırım müftisi Emirali Ablayevni sorğuğa çekmege ruhset bermedi. Bunı iyünniñ 27-de Qırım.Aqiqat mühbiri bildire.
Oturış vaqtında advokat Nikolay Polozov 2014 senesi fevralniñ 26-da Qırım Yuqarı Şurasınıñ binası yanında olğan vaqialarnıñ faal iştirakçisi Ablayevni sorğuğa çekmege rica etti.
«Ablayev fevral 26 vaqialarında faal iştirak etti, bir kün ögüne Meclis toplaşuvında iştirak etken edi. Miting vaqtında çeşme yanında dua oqup, kelgenlerge vaaznen muracaat etken edi. O, bizge buña dair malümat bere bile. Bundan ğayrı, Ablayev mahkemeden aldın taqiqat vaqtında şaat olaraq sorğuğa çekildi, faqat belli olmağan sebeplerden taqiqatçı tarafından mahkemede çıqışta bulunacaq şaatlar cedveline kirsetilmedi», – dep qayd etti Polozov.
«Qırımtatarlarnıñ taqdirinen bağlı qarar alğan birinci şahıslar arasındadır. Fevralniñ 26-sı arfesinde de. İştirak etken muzakereler, qabul etilgen qararlar. Bularnıñ episini tarif ete bile», – dep qoltuttı advokatqa Ahtem Çiygoz.
Lâkin prokuror Ablayevniñ sorğuğa çekilmesine qarşı çıqtı, mahkeme oña qoltuttı.
Bu oturışta Polozov Qırım parlamentiniñ spikeri Vladimir Konstantinovnı da sorğuğa çekmege rica etti. Mahkeme qoltuttı, sorğu iyülniñ 10-da olacaq.
Kreml kontrol etken Qırım Yuqarı mahkemesine qırımtatar milliy areketi liderleriniñ birisi Ahtem Çiygoz davası boyunca oturışqa Kreml kontrol etken Qırım milletlerara munasebetler ve sürgün olunğan vatandaşlar meseleleri komitetiniñ reisi Zaur Smirnov keldi. Sorğu devam ete.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
