Qırımtatar halqınıñ yetekçisi, Ukraina millet vekili Mustafa Cemilevniñ fikirine köre, şimdiki şaraitte Rusiye tarafından işğal etilgen Qırımda yarımadanıñ çoqusı sakinleri içün qırımtatar bayrağı qarşılıq ve namus timsali olğan. Böyle fikirni o Qırım.Aqiqatqa iyünniñ 26-nda seslendirdi.
«Atta ruslar şimdi bir ümüt ancaq qırımtatarlarnen bağlı olğanını deyler. Aynı zamanda bu – Qırımnnıñ işğalden azat etilmesini ve öz milliy ve territorial muhtariyetiniñ ğayırdan tiklenilmesini talap etecek bir halq aqqında hatırlata», – dedi Cemilev.
Qırımtatarları iyünniñ 26-nda Milliy bayraq Kününi qayd ete. Böyle bir kün olaraq, 1991 senesi iyünniñ 26-27 künlerinde Aqmescitte ötkerilgen ekinci Qırımtatar Milliy Qurultaynıñ birinci künü seçilgen edi.
Qırımtatar bayrağı – altın tamğalı kök bayraqtır.
Kyivde iyünniñ 26-da Qırımtatar bayraq künü munasebetinen bir sıra tedbir keçirilmesi planlaştırıla. Mustaqillik meydanında avtoyürüş ve miting keçirilecek.
Ukraina prezidenti Petro Poroşenko iyünniñ 26-da qırımtatar halqınıñ Milliy bayraq kününi tebrikledi ve «qırımtatar ve Ukraina bayraqları serbest Qırımda dalğalanacağından» emin olğanını bildirdi. Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
