Ukraina prezidenti Petro Poroşenko iyünniñ 26-da qırımtatar halqınıñ Milliy bayraq kününi tebrikledi. Muracaatı Prezident Memuriyetiniñ saytında derc etildi.
«Sürgünlikten tarihiy topraqlarına qaytqan qırımtatarları bütün dünyağa cesaretini kösterip, ananeviy idaresini ve milliy timsallerini ğayrıdan tikledi. Qırımtatar bayrağı qırımtatarlarnıñ azatlıq oğrunda çoq asırlıq küreşi ve birliginiñ ayırılmaz bir timsali olğan. Bu bayraqnıñ mavı ve sarı renkleri Ukraina Devlet bayrağınıñ tüsleri kibi ayat küçü ve barışıq tolu, serbest ve zengin kelecek arzusını ifadelemektedir», – dep aytıla Ukraina prezidentiniñ muracaatında
Poroşenko, «qırımtatar ve Ukraina bayraqları serbest Qırımda dalğalanacağından» emin olğanını bildirdi.
Kyivde iyünniñ 26-da Qırımtatar bayraq künü munasebetinen bir sıra tedbir keçirilmesi planlaştırıla. Mustaqillik meydanında avtoyürüş ve miting keçirilecek.
Bazarertesi künü, iyünniñ 26-da, qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-de Aqmescitte keçirilgen ekinci Qırımtatar Milliy Qurultayınıñ birinci künü belgilengen edi.
Qırımtatar bayrağı altın tamğalı kök bayraqtır.
