Link açıqlığı

Rusiye prezidenti Vladimir Putin iyünniñ 24-de «Artekni» ziyaret etip, lagerni baqıp çıqtı, balalarnen subetleşip, aşhanedeki kreplerniñ tadına baqtı. Bunı TASS bildire.

Putinniñ yanında «Artek» ziyareti vaqtında mesleatçısı Andrey Fursenko, Rusiye baş nazir muavini Olga Golodets ve Moskva tarafından tayinlengen Qırım yolbaşçısı Sergey Aksenov bar ediler. Rusiye prezidenti ilk evelâ «Artek» maketini baqtı. Anda çalışqan inşaatlar, em de 2017-2018 seneleri ve ileride qurulacaq binalar tasvirlengendir. Kompleks inkişafı planlarını Putinge lager müdiri Aleksey Kasprjak tarif etti. O, 2015 ve 2016 seneleri yapılğan işler aqqında esabat berip, kompleks inkişafınen bağlı planlarnı ikâye etti. Lager bir kereden 10 biñ balanı qabul etmesi kerek (al-azırda bir kereden qabul etilgen balalarnıñ sayısı 3,3 biñ insannı teşkil ete).

Vladimir Putin «Artek» maketini baqa
Vladimir Putin «Artek» maketini baqa

Soñra Putin aşhanege barıp, balalar aşağan yemeklerni baqtı. TASS haber etkenine köre, Rusiye prezidenti kreplerniñ tadına baqıp maqtalı. Vladimir Putin «Artekte» raatlanğan birisiniñ doğğan kününi tebrikledi.

Rusiye prezidentine sport salonı, bina ve balalar qalğan odanı kösterdiler. Putin derslerden birine kirdi.

Manzara meydançığında Rusiye prezidenti qurulayatqan ve «Artekke» qoşulacaq «Solneçnıy» lagerini baqtı.

Vladimir Putin «Artekni» dolana, 2017 senesi iyünniñ 24-ü
Vladimir Putin «Artekni» dolana, 2017 senesi iyünniñ 24-ü

Putin amerikalı Samanta Smitke bağışlanğan lagerniñ yedinci nevbetini açtı.

Rusiye prezidenti Qırımğa iyünniñ 24-de keldi. Ukraina Tışqı işler nazirligi Putin ziyaretine qarşı narazılıq bildirdi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG