Link açıqlığı

Ukraina MİD-i: Çiygoznıñ apis müddeti uzatılğanı – Qırımdaki aqsızlıqnıñ daa bir misali


Ukraina Tışqı işler nazirligi (MİD), qırımtatar milliy areketiniñ yetekçilerinden biri Ahtem Çiygoznıñ apis müddeti oktâbrniñ 8-ne qadar uzatılmasını, istilâ etilgen Qırımda üküm sürgen aqsızlıqnıñ nevbetteki misali olğanını dey. Bunı iyünniñ 22-nde nazirlikniñ temsilcisi Maryana Betsa Qırım.Aqiqatqa bergen izaatında beyan etti.

«Ukraina MİD-i Ahtem Çiygoznıñ 2017 senesi oktâbrniñ 8-ne qadar apiste tutılması aqqında Qırımdaki işğalci akimiyetniñ qararına qarşı keskin itiraz bildire. Biz oña qarşı atılğan qabaatlarnı qatiyen red etemiz. Bu – yarımadada siyasiy basqılarnıñ ve aqsızlıqnıñ şiddetleşmesi devam etkenini köstergen daa bir misaldir», – dedi Betsa.

Onıñ sözlerine köre, Ukraian MİD-i Rusiyeden Ahtem Çiygoznıñ ve başqa siyasiy mabuslarnıñ azat etilmesini ve «kreml rejiminiñ işğali astında qalğan» ukrain vatandaşlarnıñ taqibini toqtatmağa talap ete.

Kremlniñ nezaretindeki Qırım Yuqarı mahkemesi iyünniñ 22-nde ötkergen toplaşuvında prokurornıñ muracaatını qanaatlendirdi ve Ahtem Çiygoz içün apis etüv müddetini üç ayğa – oktâbrniñ 8-ne qadar uzattı.

Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.

«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.

XS
SM
MD
LG