Avropa Birliginiñ prezidenti Donald Tusk, Brükselde ötkerilgen sammit devamında AB yetekçileri Rusiyege qarşı iqtisadiy sanktsiyalarnı devam ettirmege añlaşqanlarını bildirdi.
«Añlaştıq. AB Rusiyege qarşı, Minsk añlaşmalarını eda etmegeni sebebinden, iqtisadiy sanktsiyalarnı devam ettirecek», – dep yazdı Tusk iyünniñ 22-nde öz Twitter saifesinde.
İyünniñ 22-nde Brükselde eki künlik AB sammiti başlandı. Almaniya kantsleri Angela Merkel ve Frenkistan prezidenti Emannuel Macron devlet yolbaşçılarını Minsk añlaşmalarınıñ vaziyeti aqqında haberdar etecek ediler. Rusiyege qarşı iqtisadiy sektoral sanktsiyalar, yazılı ceryan ile, Almaniya kantsleri ve Frenkistan prezidentiniñ munasip tevsiyelerinden soñra qabul etile.
ABD, Avropa Birligi ve başqa Ğarbiy memleketler bir-qaç basamaq ile Rusiyege qarşı sanktsiyalarnı qabul etken edi – başta Qırım işğali sebebinden, soñra – Donbasstaki silâlı davada Moskvanıñ tutqan yeri sebebinden.
AB tarafından Rusiyege qarşı qabul etilgen sert sektoral sanktsiyalarnıñ müddeti iyül ayında soñuna ire.
