Qırımtatar halqınıñ yetekçilerinden biri Ahtem Çiygoz, Aqmescitniñ apishanesinden çıqarılıp, ağır hastalanğan anasınen körüşmek içün Bağçasarayğa ketirildi. Radio Svobodanıñ jurnalisti Anton Naumlük Qırım.Aqiqatqa bildirgeni kibi, bunıñ episi iyünniñ 20-nde Qırım Yuqarı mahkemesinde ötkerilgen mahkeme toplaşuvınıñ teneffüsi vaqıtında ldı.
«Toplaşuvnıñ teneffesinde onı çıqarıp, anasınen qonuşmaq içün özüne 10 daqqa berildi. Şimdi o keri apishanege alıp ketile. Bese belli, kimseniñ haberi olmasın ve şamata çıqmasın dep, bunı, kerçekten, gizli yaptılar», – dedi jurnalist.
Bu malümatnı Çiygoznıñ advokatı Nikolay Polozov da Twitterde tasdiqladı ve bunen beraber mabusnıñ anasınen körüşmesi içün destek bergen er kesge teşekkür bildirdi.
Çiygoz, anasınen körüşken soñ, kene apishanege ketirildi amma toplaşuvnı devam etip olamadı. Mahkeme 20 daqqalıq teneffüs ilân etti.
İyünniñ 20-de «Çiygoz davası» baqılğan mahkeme toplaşuvında işğal etilgen Qırımdan saylanğan Rusiye senatorı Sergey Tsekov ifadelerini berdi. Toplaşuvnıñ ekinci qısımında işğal etilgen Qırımdan saylanğan Rusiye Federatsiya Şurasınıñ daa bir senatorı Olga Kovitidi sorğudan keçmeli. Anton Naumlük heber ete ki, Kovitidi mahkemege keldi, onıñ sorğusı başlandı.
Keçende, iynniñ 19-nda, Polozov öz video-muracaatını yayınlap, onıñ müşterisi Ahtem Çiygoznıñ ağır hasta anasını apishanege ketirip oğlunen körüşütürmek teklifini «ürmetsizlik» kibi tanıttı. Evel böyle teklifni Rus ombudsmeni Tatyana Moskalkova seslendirgen edi. Polozov, Moskalkovağa, em de Rusiye insan aqları şurasınıñ reisi Mihail Fedotovğa, OSCE, BM insan aqları boyunca baş komissarlığınıñ idaresine, Ukraina prezidenti Petro Poroşenkoğa muracaat etip, «yüz bergen vaziyetke deral kirişmege» talap etti.
İyünniñ 15-nde Kremlniñ nezaretindeki Qırım Yuqarı mahkemesi eki yıldan ziyade apishanede tutılğan Ahtem Çiygoznıñ ağır hastalanğan anasınen körüşmesine dair imaye tarafınıñ muracaatını red etti.
Bundan evel Qırımtatar Milliy Meclis reisi, Ukraina millet vekili Refat Çubarov qırımlı siyasiy mabus Ahtem Çiygoznıñ anası hastalanğanını beyan etken edi.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
