İşğal etilgen Qırımdan saylanğan Rusiye senatorı Sergey Tsekov Ahtem Çiygozğa qarşı şaatlıq etmedi. Bunı iyünniñ 20-de oturışnıñ birinci qısmından soñ Çiygoznıñ advokatı Nikolay Polozov bildirdi. Radio Svoboda jurnalisti Anton Naumlük ve Qırım.Aqiqat «Çiygoz davası» baqılğan mahkeme yanından canlı kösterdiler.
«Tsekov Çiygozğa qarşı malümat bermedi. O, Çiygoznıñ faaliyeti aqqında bir şey bilmegenini ayttı: cinaiy plannıñ teşkil etmesi, Çiygoznıñ fevralniñ 26-da Qırım Muhtar Cumhuriyeti Yuqarı Şurasınıñ binası yanında yapqanlarından haberi yoq», – dedi Polozov.
Mahkeme saat 14:30-da devam etecektir. Ekinci şaat, işğal etilgen Qırımdan saylanğan Rusiye senatorı Olga Kovitidiniñ sorğuğa çekilmesi beklenile.
Bundan evel işğal etilgen Qırımdan saylanğan Rusiye senatorı Sergey Tsekov «Çiygoz davası» baqılğan Kreml kontrol etken Qırım Yuqarı mahkemesine sorğuğa keldi, dep bildirilgen edi.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
