İşğal etilgen Qırımdan saylanğan Rusiye senatorı Sergey Tsekov iyünniñ 20-de «Çiygoz davası» baqılğan Kreml kontrol etken Qırım Yuqarı mahkemesine sorğuğa keldi. Bunı Radio Svoboda jurnalisti Anton Naumlük Qırım.Aqiqatqa bildirdi.
Sorğu vaqtında Tsekov Qırımnıñ sabıq baş naziri Anatoliy Mogilevniñ istifası ve bu vazifege Sergey Aksenovnıñ tayinlenmesi Ukrainanıñ sabıq prezidenti Viktor Yanukoviçnen muzakere etilgenini bildirdi. Tsekovnıñ aytqanına köre, bu qarar 2014 senesi fevralniñ 26-dan evel qabul etilgen ve bunı isbatlağan vesiqa bile bar eken.
İyünniñ 20-de kelecek ekinci şaat – işğal etilgen Qırımdan saylanğan Rusiye Federatsiya Şurasınıñ senatorı Olga Kovitidi – daa kelmedi. Üyleden soñ kelmesi beklenile.
Çiygoznıñ advokatları bugün 2014 senesi fevralniñ 26-da Qırım Yuqarı Şurasınıñ nevbetten tış toplaşuvı içün azırlanğan vesiqalarnıñ aydınlatılmasını istedi. Mahkeme imaye tarafınıñ bu muracaatlarını red etti, dep bildire jurnalist.
İyünniñ 20-de «Çiygoz davasınıñ mahkemesinde» işğal altındaki Qırımnıñ Kreml kontrol etken milletlerara munasebetler ve sürgün olunğan vatandaşlarnıñ işleri komitetiniñ reisi Zaur Smirnov sorğuğa çekilecek edi. Faqat Smirnov mahkeme kelmeyip, iş yollanmasına ketti. Onıñ sorğusı iyünniñ 21-ne avuştırıldı.
Bundan ğayrı, imaye tarafı Qırım memurları Vladimir Konstantinov, Viktor Plakida, Remzi İlyasov, Lentun Bezaziyevni şaat olaraq mahkemege sorğuğa çağırmağa rica etti. Qadılar Bezaziyevni çağırmağa razı oldı, onıñ sorğusı iyünniñ soñunda olacaqtır.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.
