Qırımda Yaltalı «Hizb ut-Tahrir davasınıñ» mabüsi Arsen Cepparovnıñ sağlığı fenalaştı ve o oña tibbiy yardım kösterilmesini istey. Bunı iyünniñ 16-da Cepparovnıñ advokatı Cemil Temişev Qırım.Aqiqatqa bildirdi.
«Onıñ (Arsen Cepparovnıñ – QA) ciddiy bir sağlıq problemleri bar edi, amma buña baqmadan, uydurılğan sebeplerden onı 20 künge kartserge qapattılar. Suvuq ve dım olğanından büyrekleri suvuqlandı, bir sıra yanğı peyda oldı», – dep qayd etti Temişev.
Onıñ bildirgenine köre, Cepparov oña tibbiy yardım kösterilmesi içün er kün ariza yaza.
«Aynı ariza yazmağa rica ettim, onı SİZO yolbaşçısı ve tibbiy bölük yolbaşçısı adına yollamağa isteyim. Bu arizanı cumhuriyet prokurorı ve Rusiye insan aqları vekâletlisine yollaycam», – dep qoştı Temişev.
İyünniñ 13-de Cepparovnı 25 künge qadar kartserge qapattılar, sebebi SİZO memuriyetiniñ talabınen odasına qapu açmağanı olğan eken.
Cepparov SİZOda yatqan soñ sağlığı pek fenalaşqan, advokatları qırımlığa tibbiy yardım köstermege talap ettiler.
Yaltalı «Hizb ut-Tahrir davasınıñ» mabüsleri Refat Alimov ve Arsen Cepparov 2016 senesi aprel 18 künü Qızıltaşta yaqalanğan soñ apiste yatalar. Birinci dört Yaltalı «Hizb ut-Tahrir işiniñ» mabüsi 2016 senesi fevral 11 künü yaqalanğan edi. Olardan eñ çoq tanılğan insan aqları kontakt gruppasınıñ azası Emir-Üsein Kukudır. Ondan ğayrı qurucı olıp çalışqanlar aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Siruk tutulğan edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
