Qırımdaki İçki rayonınıñ Ferngeym (Urojaynoye) ve Tuzlu Şeyh Eli (Prisivaşnoye) köylerinde iyünniñ 15-de Rusiye sıñırcıları politsiya hadimlerinen beraber yerli sakinlerniñ pasportlarını teşkerdi. Bunı iyünniñ 16-da Ferngeym sakini, qırımtatar milliy areketiniñ faili İbraim Usmanov Qırım.Aqiqat mühbirine bildirdi.
Onıñ aytqanına köre, iyünniñ 15-de Ferngeym ve Tuzlu Şeyh Eli köylerinde sıñırcılar politsiyanen beraber teşkerüvler keçirdi. Ferngeymde onğa yaqın şahsiy azbar baqıldı, insanlarnıñ pasportları da teşkerildi.
«1971 senesinden berli Ferngeymde oturam, mında er kesni tanıyım. Mında olğanlarğa lâqayt degilim. Tünevinki teşkerüv qırımtatar halqını aşalamaqta, dep tüşünem. Sıñırğa yaqın yer dep, mında sözde «profilaktika» yapqanlar. Mında 60 qırımtatar qorantası yaşay, bizni teşkereler. Ne maqsadnen kelgenlerini sorasam, emirleri bar olğanını aytalar. Bizden pek qorqadırlar», – dep izaatladı vaziyetni Qırım.Aqiqatqa İbraim Usmanov.
Ferngeym sakini Ümer Ametov ve qomşusı teşkerüvge oğrağanlar arasına kirdi. «Teşkerüvni yerli biri ve sıñırcı zabit keçirdiler. Er kesniñ pasportını baqalarmı dep sorasam, yoq, saylap alğanlarını ayttılar», – dep ayttı Qırım.Aqiqatqa Ümer Ametov.
Rusiye uquq qoruyıcıları Qırımnıñ İçki rayonında olğan teşkerüvlerni şimdilik izaatlamay.
İyünniñ 15-de Qırımtatar Milliy Meclisiniñ azası Eskender Bariyev Facebook saifesinde Ferngeym köyünde Rusiye uquq qoruyıcıları yerli sakinlerniñ pasportlarını teşkermek içün evlerini baqıp çıqqan, dep yazdı.
Uquq qoruyıcılar vesiqalarnı teşkerip, köy «Qırımnıñ sıñır alanında» yerleşkenini qayd etti.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
