Link açıqlığı

Qazahistan MİD temsilcisi: Qırımsız Ukraina haritası ekspozitsiyasınıñ muellifleri afu soradı


Qazahistan tışqı işler naziriniñ muavini Muhtar Tleuberdi Astana Art Fest festivalindeki ekspozitsiayanıñ muellifleri, Ukraina elçihanesine Ukraina haritası tasvir etilgen eksponatlarnıñ birinde Qırım bulunmaması boyunca resmiy afu mektubu yollağanlarını bildirdi. Bu aqta iyünniñ 13-nde «Sputnik Kazahstan» bildirmekte.

«Bu adiseni siyasiyleştirmege acet yoq – bir yerleştirme teşebbüsi olğan, lâkin bu bir icadiy birleşmeniñ eseridir, onıñ içün er angi bir siyasiy maqsat taşımamaqtadır. Demek ki, ressamlar siyasiy inceliklerge dalmadan, icadiy yanaşqanlar. Olar öz qabaatını tanıp, Ukraina elçihanesine resmiy afu metinli muracaat mektübi yollağanlar», – dedi Tleuberdi.

Daa evel Qazahistandaki Ukraina elçiligi Astanağa Astana Art Fest festivalinde azırlanğan ekspozitsiayada Ukraina haritası tasvir etilgen eksponatta onıñ terkibinde Rusiye tarafından işğal etilgen Qırım territoriyası bulunmamasınen bağlı narazılığını bildirgen edi.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG