Qazahistandaki Ukraina elçiligi Astanağa Astana Art Fest festivalinde azırlanğan ekspozitsiayada Ukraina haritası tasvir etilgen eksponatta onıñ terkibinde Rusiye tarafından işğaşl etilgen Qırım territoriyası bulunmamasınen bağlı narazılığını bildirdi. Bu aqta iyünniñ 12-nde elçihaneniñ Facebook saifesinde bildirilmekte.
«Astanada Nurjol bulvarında Astana Art Fest festivali çerçivesinde Ukraina haritasında devletniñ territorial bütünligini bozğan alâmetler mevcut. Rusiye haritası – Ukraina devlet mustaqilligini bozğan alâmetlernen azırlanğan. Qazahistan Cumhuriyeti Tışqı işler nazirliginden añlatuv ve areket bekleymiz», – denilmekte haberde.
Diplomatlarnıñ metinleri tübünde hususan, yer kürresi tasvir etilgen bir figuranıñ merkezinde –tolu şekilde aks ettirilmegen Ukraina territoriyası haritasınıñ bir fragmenti ve şekil olaraq, terkibine Qırım ilâve etilgen Rusiye haritasınıñ fotoresimleri yerleştirilgen.
Keççe qullanıcılarnıñ biri işbu haber altında fotoresim derc etip, yanlış resim üzeri boyalanğanı aqqında haber etti.
Alâ daa Qazahistan MİDniñ reaksiyası kibi, vaqianen bağlı resmiy tasdıq yoq.
İyünniñ 10-nda Astanada Rusiye prezidenti Vladimir Putin iştirakinen, yanında dekorativ eykeller yerleştirilgen ekspoziyalı üç aylıq ESPO-2017 energetik sergi başlandı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
