Qırımda vatandaşlarğa tınç toplaşuvlar aqqını qullanmağa izin berilmey. Bunı iyünniñ 12-nde Qırım uquq qorcalayıcı gruppasınıñ iştirakçileri «Uyğunlaşmağan azatlıq: Qırımda tınç toplaşuvlar serbestliginiñ bozıluvına dair analitik inceleme» adlı esabatnıñ taqdim etilüvi vaqıtında beyan etti.
«Qırımnıñ akimiyeti sistematik ve muntazam surette toplaşuvlarğa qarşı esassız sıñırlar qullana ve ancaq akimiyetke riayetkâr olğanlarğa toplaşmağa izin bere... Kerçekten, Qırımda er türlü tınç toplaşuvlar yasaq etilgenini ayta bilemiz», – dedi «İnsan aqları platforması» cemaat teşkilâtınıñ eksperti Aleksandr Burmagin.
Qırım uquq qorcalayıcı gruppasınıñ reberi Olga Skripnik dedi ki, Qırımda başqa insan aqları da bozula, ve yarımadada «basqığa oğrağanlar ancaq ukrain tarafdarı olmağanını» ayttı.
Uquq qorçalayıcılar ukrain akimiyetini Qırımda insan aqları bozuvlarını tedqiq etmege çağırdı, halqara teşkilâtlarnı ise istilâ etilgen yarımadada insan aqlarını devamlı nezaret etmege ve bozuvlarğa qarşı itiraz bildirmege çağırdı.
Ukrain uquq qorçalayıcıları Rusiye akimiyeti, Ukraina akimiyeti ve halqara müessiseler içün öz tekliflerini azırladı. Qırım uquq qorçalayıcı gruppası bu malümatnı Tınç toplaşuvlar ve birleşüvler suallerinde BM esabatçısına endi yolladı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
