Link açıqlığı

Qırımda Rusiye Künü qayd etilecek vaqıtta keñiş surette «Sözleşmeli Askerlik – Seniñ seçimiñ!» şiarı ile malümat berici ve teşviqat etici aktsiyanıñ keçirilmesi belgilene. Bunı Rusiye Mudafaa nazirliginiñ matbuat hızmeti haber ete.

Berilgen malümatqa köre, bu kibi aktsiyalar Rusiye Cenübiy federal bölüginiñ bir sıra şeerlerinde keçirilecegi azırlanıla.

Merasim devamında Cenübiy arbiy bölüginiñ (CAB) arbiy tehnikası numayış etilecek, bu sırada: «Tayfun-K» ve «Tigr» kibi zırhlı maşnalar, kabinası zırhlı olğan KamAZ, atıcı silahlar, arbiy kiyimler ve asker techizatları kösterilecektir.

«Aktsiyalar keçirilecek yerlerde vatandaşlarnı sözleşmeli askerlikke seçmek içün taşılğan noqtalar çalışacaq, anda professional CAB talimatçıları istegen er kimsege CAB birliklerinde ve arbiy bölüklerinde sözleşmeli askerlikte bulunmaqnıñ imtiyazları ve içtimaiy teminatı aqqında tarif etecek», – dep haber etile.

Merasim ziyaretçilerine «asker pastası» bedava berilecegi vade etile.

Rusiye Künü iyünniñ 12-nde qayd etile. Bayram merasimleri, 2014 senesinden berli de-fakto olaraq Rusiye tarafından nezaret etilgen Qırımda da azırlanıla.

2016 senesi Birleşken Milletler Teşkilâtınıñ üçünci komiteti, yarımada sakinleriniñ Rus silâlı quvetlerine çağırılmasını Rusiyege yasaqlağan rezolütsiyanı qabul etken edi.

Dekabr 19 künü Birleşken Milletler Teşkilâtınıñ Baş Assambleyası, Rusiyeni istilâcı devlet, Qırımnı ise – vaqıtınca işğal etilgen topraq olaraq tanığan rezolütsiyasını qabul etti. İşbu rezolütsiyasınen BM Rusiyege mesuliyetlik yükledi ve munasip mecburiyetlerni eda etmege – işğal etilgen topraqqa nisbten Halqara uquq qaidelerine riayet etmege talap etti.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG