Link açıqlığı

Ukraina devlet sıñır hızmeti: Qırımğa deñizcilerni yollağan gemi Odesa vilâyetinde tutıldı


Ukraina devlet sıñır hızmeti iyünniñ 9-nda Odesa vilâyetinde, istilâ etilgen Qırımğa insanlarnı qanunsız yollamaq içün qullanılğan gemi tutılğanı aqqında haber etti.

«2017 senesi iyünniñ 8-nde Devlet sıñır hızmetiniñ Cenübiy regional idaresi, Odesa sıñırcılar otrâdı ve Milliy politsiyanen birlikte, adamlarnı (deñizcilerni) qanunsız şekilde sıñırdan keçirgen «Bospor» gemisini (Moldova bayrağı astında) tuttı. Uquq qoruyıcılar tasdiqladı ki, 2015-2017 seneleri devamında cinayetkârlar, çet memleketlerniñ gemilerini qulanıp, qapatılğan keçit yerlerinden vaqıtınca istilâ etilgen Qırım Muhtar Cumhuriyetine deñizcilerni ketire edi», – dep haber etile.

Müessisede dediler ki, 2015-2016 senelerinde «bu bağnı teşkil etkenler aman-aman 100-ge yaqın Odesa ve Herson vilâyeteleriniñ sakinlerini sıñırdan keçirdi».

Tevqif etilgen malnıñ fiyatı şimdilik 44,5 million grivnalıq olğanı esaplana.

«Cinaiy ceryannıñ açılmasınen bağlı nevbetteki areketler şimdi devam ete», – dep qoştı müessiseniñ matbuat hızmeti.

Bir ay evelsi, mayısnıñ 10-nda, Ukraina Devlet sıñır hızmeti, işğal etilgen Qırımnıñ limanlarından deñizge qanunsız çıqqan gemilerde çalışmaq içün deñizcilerni yollağan şirketni tapqanını beyan etken edi.

2014 senesi iyül ayından berli Ukraina akimiyeti Rusiye tarafından işğal etilgen Qırımdaki bütün deñiz limanlarnıñ işini toqtatqan edi, yarımadadaki limanlar halqara gemicilik içün qapatıldı. Ukraina Nazirler şurası 2015 senesi mayıs ayında resmiy olaraq Qırımnıñ deñiz liminlarını çetel gemilerni qabul ete bilecek limanlarnıñ cedvelinden çıqardı.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG