Uruş azırığını teşkermek içün Rusiye Cenübiy arbiy bölüginiñ (CAB) bekçilik yapqan Su-27 uçaqları Qırımda telüke işaretinen avağa köterildi. Bunı, CAB matbuat hızmetiniñ yolbaşçısı Vadim Afanasyevniñ sözlerine atıf etip, «RİA Novosti Krım» haber ete.
Uçucılarnıñ arbiy azırlığını CAM komandanı Aleksandr Dvornikov teşkergeni beyan etile. İstilâ etilgen Qırımğa yapqan ziyaretiniñ birinci kününde o Belbek ava limanında idman tesislerini, arbiy erkânnı ve aviatsion bölükleriniñ vaziyetini teşkergen.
Keçende, Ukrainanıñ sıñrları yanında Rusiye orduları apansızdan teşkerelip başlanğanı ve işğal etilgen Qırımğa arbiy bölükler yollanılğanı aqqında haber etilgen edi. Cemi sayıda, tank, motoatıcı, ağır silâlar bölüklerinden em de Rusiyeniñ Qara deñiz flotı ve Hazar flotiliyası deñiz piyade bölüklerinden 6,5 biñden ziyade asker ve tahminen 1,5 biñ arbiy ve mahsus tehnika maşnası ameliy idmanlarğa celp etilgeni qayd etile.
Bundan evel Ukraian Baş komandanlığı istilâ etilgen Qırımda Rusiyeniñ ötkergen idmanlarını qanunsız tanığan edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
